Gúlshara Ábdiqalyqova óńirlerge jasaǵan jumys saparlaryn qorytyndylady
«Elbasynyń «Áleýmettik qamqorlyq» atty jańa áleýmettik sharalaryn iske asyrý jónindegi aqparattyq túsindirý jumystaryn júrgizý úshin 12 naýryzdan 4 mamyrǵa deıin osy otyrǵan qurammen úkimettik jumys toby elimizdiń barlyq óńirlerine bardy. Osy ýaqytqa deıin 263 kezdesý ótkizdik. 157 eldimekende bolyp, 269 adam jeke qabyldandy. Turmysy tómen 72 otbasynyń úıine bardyq. Jalpy, sany 27 myń adamdy qamtydyq», - deıdi Gúlshara Ábdiqalyqova Úkimettiń baspasóz ortalyǵynda.
Onyń aıtýynsha, saparlar baǵdarlamasyna myna jumystar kirgen: birinshiden aımaq turǵyndarymen kezdesý uıymdastyrylǵan. Olardyń quramyna kópbalaly jáne turmys tómen otbasylar, eńbek ardagerleri, múgedekter, bilim salasy men densaýlyq saqtaý, halyqtyń áleýmettik qorǵaý salasynyń qyzmetkerleri, qalalar men aýyl turǵyndary engen.
«Kezdesýlerdi taldaı kele halyqtyń áleýmettik osal sanattaryn, eń aldymen kópbalaly jáne turmysy tómen otbasylardy turǵyn úı, ataýly áleýmettik tólem, jumysqa ornalasý, shaǵyn nesıe berý, jer telimderin berý, bilim berý, densaýlyq saqtaý sapasyn jáne basqa da ózekti óńirlik máselelerdi kóteretinin kórdik. Ekinshiden aýdan ákimdikterimen, kásiporyndar basshylarymen, bıznes-qurylymdarynyń jetekshilerimen kezdesý ótip, áleýmettik eńbek saıasat, jalaqysy tómen azamattardyń aılyǵyn kóterý, aılyq boıynsha qaryzdy óteý, eńbek qaýipsizdigin saqtaý máseleleri talqylandy. Áleýmettik kómek boıynsha bıznes qurylymdarynyń belsendiligin erekshe atap óter edim», - deıdi Úkimet basshysynyń orynbasary.
Gúlshara Ábdiqalyqova Almaty oblysynda «Aq terek» sharýa qojalyǵynyń ıesi Temirlan Shaınúsipov degen azamattyń aýyldastaryn jumyspen qamtyp qana qoımaı, áleýmettik salaǵa aqsha bólip jatqanyn atap ótti. Ol bıznesmen aýylynda balabaqsha, sport alańyn, saýda ortalyǵyn salǵan. 2008 jyldan bastap kópbalaly jáne turmysy tómen otbasylar úshin 105 páter turǵyzyp bergen.
«Qostanaı oblysynda «Eńbek» baǵdarlamasynyń, Qyzylorda oblysynda bilim men ǵylymǵa qatysty baǵdarlamalardyń, Aqmola oblysynda «Densaýlyq» baǵdarlamasynyń, Jambyl oblysynda alǵashqy medıtsınalyq kómek berý baǵdarlamasynyń, SQO-da eńbek resýrstarynyń mobıldiligi jumystarynyń barysy talqylandy», - deıdi Gúlshara Ábdiqalyqova.
