Gúlshara Ábdiqalyqova óńir jurtshylyǵyna úndeý joldady
QYZYLORDA. QazAqparat - Qyzylorda oblysynyń ákimi Gúlshara Ábdiqalyqova koronavırýs jaǵdaıynyń kúrdelenýine baılanysty óńir jurtshylyǵyna úndeý joldady, dep habarlaıdy QazAqparat tilshisi.
Óńir basshysy óz úndeýinde: «qazirgi tańda elimizde koronavırýs indeti órship turǵanyn bilesizder. Vırýstyń taralý deńgeıi boıynsha áli «qyzyl aımaqtan» shyǵa almaı otyrmyz. Sońǵy 10 kúnde osy indetpen aýyrǵandar sany 2 myńnan asyp barady. Osy jaǵdaıdy eskerip, óńirde ınfektsııalyq tósek-oryn sanyn 4 esege deıin ulǵaıttyq. Búgin medıtsınalyq mekemelerdiń indettiń odan ári taralýyna ázirligin pysyqtaý úshin modýldi juqpaly aýrýlar aýrýhanasyna baryp, reanımatsııada jatqan naýqastardyń jaǵdaıymen tanystym», - dep atap ótti.
Onyń aıtýynsha, Úkimettiń qoldaýymen 200 tósektik modýldi statsıonar osy aptadan bastap aýrýlardy qabyldaýda. Vırýs juqtyrǵan azamattardyń jaǵdaıy turaqty baqylaýǵa alynǵan. Naýqastarǵa qajetti dári-dárimek tolyq jetkilikti, mamandardyń jumys rejımi jolǵa qoıylǵan.
«Desek te, bul indetpen aýyrmaýdyń joly – óz qolymyzda. Kópshilik adamdar jınalatyn sharalardy, jıyn-toılardy ázirge qoıa turǵan durys. Biz ásirese, balalarymyzdy indetten saqtaýǵa mindettimiz.
Vırýstyń jańa shtamdary kúnnen kúnge kóbeıýde. Keshe ǵana AQSh-tyń Nıý-Iork qalasynda «Iota» jańa shtamy paıda boldy. Bul bizden indetten saqtaný sharalaryn qatań ustanýymyzdy talap etedi. Balalarymyzdyń qaýipsizdigi, jaqyndarymyzdyń amandyǵy úshin karantın talaptaryn saqtaı otyryp, ekpe alýlaryńyzdy suraımyn», - dedi oblys ákimi óz úndeýinde.
