Gúlshara Ábdiqalyqova óńir turǵyndaryna úndeý jasady
«Qurmetti, jerlester! Sońǵy kúnderdegi ahýal bárimizdi beı-jaı qaldyryp otyrǵan joq. Búgin Memleket basshysy elimizdegi áleýmettik-ekonomıkalyq jaǵdaıǵa qatysty keńes ótkizdi, qosymsha birqatar tapsyrmalar berdi:
1.Munaı ónimderiniń (benzın, dızel, suıytylǵan gaz) baǵasyna memlekettik retteýdi 180 kúnge engizý;
2.Áleýmettik mańyzy bar azyq-túlik taýarlarynyń baǵasy boıynsha memlekettik retteýdi engizý;
3.Halyq úshin 180 kúnge kommýnaldyq tarıfterdi kóterýge moratorıı engizý qajettigin qarastyrý;
4.Halyqtyń áleýmettik jaǵdaıy nashar toptary úshin naryqtaǵy baspanany jalǵa alý qunyn sýbsıdııalaý máselesin qarastyrý;
5.Densaýlyq saqtaý jáne balalar máselelerin sheshý úshin «Qazaqstan halqyna» dep atalatyn qoǵamdyq qor qurý, ony memlekettik jáne jeke kózder arqyly qarjylandyrý.
Іshten jáne syrttan bolǵan san túrli aqparatqa senip, elimizdiń tutastyǵy men birligine syzat túsirýdi kózdeıtin destrýktıvti toptardyń arandatýshylyǵyna ermeı, parasatpen, aqylmen sheshim qabyldaýǵa shaqyramyn.
Eldiń árbir azamaty zańdy saqtaýy tıis!
Óńirdegi qoǵamdyq-saıası ahýal túgel bizdiń baqylaýymyzda tur, zań aıasynda barlyq ótinishter men talaptar eskerilip, tıisti sheshimder qabyldanady.
Barlyq másele beıbitshilik formatta sheshilýi kerek.
Jastar, jarqyn bolashaǵymyzdy, jaqyndarymyzdyń amandyǵyn oılaıyq!»,-dedi ákim.
Sonymen qatar ol Syr eli – qalyń qazaqtyń qaımaǵy buzylmaǵan, aýyzbirshilikti saqtaǵan berekeli ordasy ekenin atap ótti.
«Altaý araz bolsa, aýyzdaǵy keter, tórteý túgel bolsa, tóbedegi keler», - degen halyqpyz.
«Eldiń tynyshtyǵyn, birligimizdi saqtaıyq, ardaqty aǵaıyn!»,-dedi ol.
