Gúlshara Ábdiqalyqova oblys turǵyndaryna úndeý jasady

QYZYLORDA. QazAqparat - Qyzylorda oblysy epıdemıologııalyq jaǵdaıdy baǵalaý matrıtsasyna sáıkes 21 sáýirden bastap «sarydan» «qyzyl aımaqqa» aýysty. Osyǵan baılanysty aımaq basshysy Gúlshara Ábdiqalyqova turǵyndarǵa úndeý jasady, dep habarlaıdy QazAqparat tilshisi.

«Búgin oblysymyz «qyzyl aımaqqa» endi. Bul qýanatyn jaǵdaı emes. Pandemııa bastalǵannan bergi ýaqytta óńirde 4890 jaǵdaı tirkelgen. Álemdi dúrliktirgen indettiń beti qaıtar túri joq. Sońǵy ýaqytta vırýs juqtyrǵandardyń sany tym kóbeıip barady.

«Qamysty bos ustasań, qolyńdy kesedi» deıdi dana halqymyz. Saqtyq sharalaryna mán berýdi umytsaq, qózge kórinbeıtin tajaldyń kez kelgen sátte qater tóndireri anyq. Ony tek saqtaný arqyly ǵana jeńe alamyz», - dedi oblys ákimi.

Oblys ákimi osy rette jergilikti mekemelerdiń, halyqqa qyzmet kórsetý oryndarynyń basshylary vırýs tez taraıtyn adamdar tyǵyz jınalatyn oryndarda, ǵımarattarda halyqtyń sapyrylysyn rettegeni jón ekenin atap ótti.

«Densaýlyq aldymen ózimizge kerek. Sondyqtan, árbir adam ózine ǵana emes, otbasyna, týǵan-týysyna, aınalasyndaǵy adamdarǵa zııanyn tıgizbeýi tıis. Toı-tomalaq, as berý, basqa da kópshilik jıyndardy jaqsy kúnderge qaldyra turaıyq. Densaýlyǵymyz bárinen qymbat ekenin umytpaǵanymyz jón. Qarapaıym qaǵıdatty eskereıik: maska, antıseptık jáne ara qashyqtyqty saqtaý.

Qaýipti indettiń uzaqqa sozylmasy úshin osy qaǵıdattardy eskerip, óz densaýlyqtaryńyzǵa asqan jaýapkershilikpen qarap, karantın talabyna baǵynýǵa shaqyramyn», - delingen oblys ákiminiń úndeýinde.

Eske salsaq, Qyzylordada karantın shekteýi kúsheıtilýi múmkin.