Gúlshara Ábdiqalyqova «Mereıli otbasy» konkýrsy jónindegi komıssııanyń otyrysyn ótkizdi

ASTANA. QazAqparat - 21 maýsymda Astanada QR Memlekettik hatshysy G.Ábdiqalyqovanyń tóraǵalyǵymen «Mereıli otbasy» ulttyq konkýrsynyń laýreaty ataǵyn berý jónindegi komıssııanyń otyrysy ótti, dep habarlaıdy QazAqparat.

Otyrysty ashqan Memlekettik hatshy Elbasy  N.Nazarbaevtyń: «Otbasynda adam boıyndaǵy qasıetter jarqyraı kórinip, qalyptasady. Otanǵa degen ystyq sezim jaqyndaryńa, týǵan-týysqandaryńa degen súıispenshilikten bastalady» degen sózderine toqtaldy.

Gúlshara Ábdiqalyqova jyl saıyn konkýrsqa qatysýshylardyń sany artyp kele jatqanyn atap ótti. Bıyl oǵan 2952 otbasy qatysqan, bul 2014 jylmen salystyrǵanda 2,3 ese kóp.

Óziniń besjyldyq tarıhynda baıqaýǵa 11 993 otbasy qatysty, sonyń 60% (7 172 otbasy) aýyldan, onyń ishinde 37%-y (4489) kópbalaly otbasylar, 18% (2129) jas otbasylar, 18%-y (2117) bir mamandyq eńbekkerleri áýletteriniń ókilderi.

Konkýrs úsh kezeń - aýdandyq, óńirlik jáne ulttyq kezeń boıynsha ótedi.

Baıqaý jeńimpazdaryn anyqtaý barysynda otbasy músheleriniń jetistikteri men olardyń mańyzdylyǵy, úlkenderge degen qurmet pen súıispenshilikke negizdelgen rýhanı-adamgershilik qundylyqtaryn saqtap, urpaqtan-urpaqqa jalǵastyrý basty ustanym bolyp tabylady.

Bıylǵy mamyr aıynda barlyq oblystarda jáne respýblıkalyq mańyzy bar qalalarda aımaqtyq kezeń jeńimpazdaryn marapattaýǵa arnalǵan is-sharalar men saltanatty rásimder ótkizildi, sondaı-aq ár óńirden aqyrǵy kezeńge qatysatyn 2 otbasy belgili boldy.

Komıssııa músheleri konkýrstyń ulttyq kezeńine qatysatyn 16 úmitkerdi anyqtady.

Qazaqstandyqtar «Mereıli otbasy» konkýrsynyń aqyrǵy kezeńinde jeńimpazdy anyqtaýǵa kaztube.kz saıty jáne SMS-habarlamalarmen daýys berý arqyly qatysa alady.

Daýys berý qorytyndysy qyrkúıektiń ekinshi jeksenbisinde merekelenetin Otbasy kúni qarsańynda shyǵarylady.