Gúlshara Ábdiqalyqova Memlekettik saıasat ulttyq mektebiniń tyńdaýshylarymen kezdesti
«Ózderińizde bilesizder, bıyl Astananyń 20 jyldyǵy úlken mereke bolmaq. Sonymen qatar, Memlekettik saıasat ulttyq mektebiniń qurylǵanyna da 10 jyl tolady. Elbasy osy Astanaǵa kóshken kezde memlekettik qyzmetkerlerge arnalǵan akademııa bolsyn dep sheshim qabyldaǵan edi. Akademııa qurylǵannan beri búkil respýblıka boıynsha memlekettik qyzmetshilerimiz biliktilikterin shyńdap, qosymsha bilim alyp, qazir oblystarda jumys istep jatyr. Maǵan berilgen málimet boıynsha, sizder qazir magıstratýrany bitirip jatqan eń úzdik mamansyzdar. Onyń ishinde erekshe aıtarym, sizder úsh tildi qazaq, orys jáne aǵylshyn tilderin meńgergensizder»,- dedi kezdesý barysynda Memlekettik hatshy.
Gúlshara Ábdiqalyqova Ult jospary boıynsha elimizde memlekettik basqarý salasynda úlken reformalar júrgizilip, birinshi kezekte zańdarǵa ózgerister engizilgenin atap ótti.
«Merıtokratııaǵa negizdelgen memlekettik basqarý quryldy dep aıtýǵa bolady. Bul ózgeristerdiń taıaýda jemisin kóremiz dep oılaımyn. Sonymen qatar, memlekettik qyzmettiń quzireti belgilenip, jańa eńbekaqy tóleý júıesi qalyptastyryldy. Ol birneshe memlekettik organda beıimdelýden ótip jatyr. Ary qaraı ózin-ózi jaqsy aqtaıtyn bolsa, onda ol búkil respýblıka boıynsha engiziledi», - dedi ol.
Memlekettik hatshy qazirgi ýaqyt tsıfrlandyrý dáýiri bolǵandyqtan talap kúnde ózgerip otyratyndyǵyna da aıryqsha nazar aýdardy.
«Memlekettik qyzmetshilerge de talap óte joǵary. Soǵan baılanysty ómir boıy bilimdi shyńdaý degen maqsatpen memlekettik qyzmetshiler bizdiń akademııamyzda, ulttyq mektepte arnaıy qosymsha bilim alady. Jalpy akademııada strategııalyq josparlaý, saıasatqa baǵa berý, uıymdastyrýshylyq qabilet degen sııaqty jańa pánder oqytylyp jatyr. Munyń barlyǵy halyqaralyq tájirıbeden alynǵan», - dedi G.Ábdiqalyqova.
Kezdesý sońynda Gúlshara Ábdiqalyqova Memlekettik saıasat ulttyq mektebiniń tyńdaýshylaryna jańa bilimderin, iskerilkteri men mashyqtaryn memlekettik qyzmet barysynda Qazaqstan halqynyń ıgiligi jolyna jumsaýlaryna tilektestigin bildirdi.
Aıta keteıik, ulttyq mektep Elbasy Nursultan Nazarbaevtyń tapsyrmasymen 2008 jyly quryldy. Osy jyldar ishinde ol jańa formattaǵy 140 memlekettik basqarýshyny daıarlap shyǵardy.
