Gúlshara Ábdiqalyqova «La Skala» teatrynyń bas dırektorymen kezdesti
«Sizdi kórgenimizge qýanyshtymyz. Elimizde opera óneri, balet óte joǵary baǵalanady. Óıtkeni «La Skala» teatrynyń álemdik mádenıette óz orny bar. «La Skala» teatrynyń 2014 jylǵy alǵashqy gostrolin áli kúnge jyly eske alamyz. Sol kezde Don Kıhot baletin tamashalaǵan edik. Qazaqstan búginde óz Táýelsizdiginiń 26 jyldyǵyna aıaq basty. Osy jyldar ishinde Prezıdentimizdiń basshylyǵymen mádenıet salasyna basa nazar aýdarylyp, mádenıetti damytýǵa arnalǵan birneshe úlken baǵdarlama, naqty jobalar júzege asyryldy», - dedi Memlekettik hatshy kezdesý barysynda.
Sonymen qatar ol Astana opera teatry Qazaqstannyń mádenıet salasyndaǵy shoqtyǵy bıik jetistik sanalatyndyǵyn jáne «La Skala» teatrynyń tyǵyz qarym-qatynas ornatqandyǵyn basa aıtty.
«Búgingi tańda 18 mln. turǵyny bar elimizde 52 teatr bar. Onyń ishinde birneshe opera jáne balet teatry, dramalyq, ulttyq teatrlar jumys istep tur. El Prezıdenti teatr salyp, tek alǵa umtylatyn el ǵana tarıhı mádenıetke kende bolmas dep atap ótken bolatyn. Qazirgi ýaqytta elimiz tutas ult bolý jolyndaǵy rýhanı jańǵyrýdy bastan keshirýde. Biz mádenıet pen mádenı damýǵa arqa súıeıtin bolamyz. Sondyqtan qazaqstandyq mádenıetti búkil álemge tanystýrǵa baǵyttalǵan úlken joba qolǵa alynady», - dedi Gúlshara Ábdiqalyqova.
Kezdesý barysynda taraptar opera jáne balet óneri salasyndaǵy yntymaqtastyqty damytý «La Skala» teatrynyń Qazaqstandaǵy gastrolin jáne «Astana Opera» memlekettik opera jáne balet teatrynyń Italııadaǵy óner saparlaryn ótkizý tájirıbesin keńeıtý jaıyn talqylady.
Munan bólek, júzdesý barysynda QR Memlekettik hatshysy «EKSPO-2017» kórmesi aıasynda 1-10 kúrkúıek kúnderi arasynda «La skala» teatrynyń tolyq quramdaǵy gastroli ótetindigin atap ótti.
