Gúlshara Ábdiqalyqova Qyzylordada turǵyn úı qurylysymen tanysty

QYZYLORDA. QazAqparat - Qyzylorda oblysyna jumys saparymen kelgen Qazaqstan Respýblıkasy Premer-Mınıstriniń orynbasary Gúlshara Ábdiqalyqova kópbalaly otbasylarǵa arnalǵan turǵyn úıler qurylysymen tanysty, dep habarlaıdy QazAqparat tilshisi.

«Báıterek» shaǵyn aýdanyndaǵy turǵyn úıler kópbalaly otbasylarǵa arnalǵan «Balameken» jobasy negizinde salynǵan. Syr óńirinde az qamtylǵan jáne kópbalaly 150 otbasy oblystyq bıýdjet qarajaty men qaıyrymdylyq qorynyń kómegi arqasynda turǵyn úımen qamtamasyz etiledi. Baspanalar bıýdjetten - 50 jáne qor esebinen 100 otbasyǵa salynady.

Baspananyń 1 sharshy metriniń quny 70 myń teńge. Turǵyn úı qurylysy 1 qyrkúıekke deıin aıaqtalady dep josparlanǵan. «Bolat Ótemuratov qory» turǵyn úılerdi salý boıynsha «Balameken» jobasynyń júzege asyrylýyna 450 mln teńge bóldi. Al jergilikti basshylyq bul ýaqytqa deıin barlyq ınjenerlik ınfraqurylymdar - elektr, gaz, sý, telefon baılanysy men avtojoldar qurylysyn aıaqtaýǵa, sondaı-aq árbir úıge 6 sotyq jer telimin bólýge kepildik berip otyr.

Esterińizge sala ketelik, 27 naýryzda Úkimet úıinde ótken keńes barysynda Premer-Mınıstr Asqar Mamın kópbalaly otbasylardy baspanamen qamtýda Qyzylorda oblysyn úlgi etken bolatyn.

Esterińizge sala ketelik, «Báıterek» shaǵyn aýdany 2016 jyly el ıgiligine aınaldy. Onda 6 600 turǵynǵa jer telimi berilgen bolatyn.