Gúlshara Ábdiqalyqova Qazaqstandaǵy BAÁ elshisimen kezdesti
Bul týraly Aqordanyń baspasóz qyzmeti habarlaıdy.
Kezdesý barysynda Qazaqstan men Ámirlikter arasyndaǵy ózara yqpaldastyqtyń qazirgi jaǵdaıy, sondaı-aq saıası, ekonomıkalyq jáne mádenı-gýmanıtarlyq salalardaǵy yntymaqtastyqtyń perspektıvalary talqylandy.
- Qazaqstan Prezıdenti Nursultan Nazarbaev pen Birikken Arab Ámirlikteriniń basshysy sheıh Halıfa Ál Nahaıannyń tyǵyz ári ózara senimdi baılanystarynyń arqasynda elderimiz arasynda dostyq qarym-qatynas ornady, - dedi Memlekettik hatshy.
G.Ábdiqalyqova Qazaqstannyń 4.0-Indýstrııasy elementterin engizýdi jáne álemniń ozyq damyǵan otyz eliniń qataryna qosylýdy kózdeıtin Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty joldaýyn iske asyrýǵa kiriskenin atap ótti.
- Biz BUU Qaýipsizdik Keńesiniń turaqty emes múshesimiz. Taıaýda Nursultan Nazarbaev Qaýipsizdik Keńesiniń otyrysyndaǵy sóılegen sózinde halyqaralyq ómirde saıası senim men júıeli dıalogtyń mańyzdy ekenine nazar aýdarǵan bolatyn, - dedi Memlekettik hatshy.
Gúlshara Ábdiqalyqova «Astana» halyqaralyq qarjy ortalyǵy men Ámirlikterdiń qarjy ortalyqtary arasynda ózara belsendi is-qımyldy jalǵastyrýdyń mańyzdy ekenin atap ótti.
Sońynda Memlekettik hatshy Birikken Arab Ámirlikteriniń Halyqaralyq «Astana EKSPO-2017» mamandandyrylǵan kórmesine belsendi atsalysqany úshin rızashylyq bildirip, Dýbaıdaǵy kelesi EKSPO-2020 kórmesiniń joǵary deńgeıde ótetinine senim bildirdi.
- Qazaqstan Birikken Arab Ámirlikterimen tolyqqandy strategııalyq seriktestik ornatýǵa múddeli jáne EKSPO-2020 kórmesine belsendi atsalysatyn bolady, - dedi G.Ábdiqalyqova.
***
Qazaqstan Respýblıkasy men Birikken Arab Ámirlikteri arasyndaǵy taýar aınalymy 2017 jylǵy qańtar-qarasha aralyǵynda 590,3 mıllıon AQSh dollaryn qurady. 2005-2017 jyldary Ámirlikterden Qazaqstanǵa kelgen tikeleı ınvestıtsııanyń jalpy kólemi shamamen 2 mıllıard AQSh dollaryna jetti.
Qazaqstanda Ámirlikter kapıtalynyń qatysýymen 233 birlesken kásiporyn jumys isteıdi. Eń iri ekijaqty ınvestıtsııalyq joba - quny 1,2 mıllıard AQSh dollary bolatyn «Abý Dabı Plaza» kóp fýnktsıonaldy kesheni.
