Gúlshara Ábdiqalyqova ІІ Eýrazııalyq áıelder forýmyna qatysty

ASTANA. QazAqparat - «Áıelder jahandyq qaýipsizdik pen ornyqty damýdy qoldaıdy» atty Ekinshi Eýrazııalyq áıelder forýmyna RF Prezıdenti V.Pýtın, halyqaralyq uıym jetekshileri, sondaı-aq álemniń 100 elinen 500-den astam ókil qatysty, dep habarlaıdy QazAqparat Aqrordanyń resmı saıtyna silteme jasap.

JıyndyReseı Federatsııasy Federaldyq Jınalysynyń Federatsııa Keńesi men TMD-ǵa qatysýshy memleketterdiń Parlamentaralyq Assambleıasy uıymdastyrdy.

Qazaqstan delegatsııasynyń quramyna Parlament depýtattary, memlekettik organ basshylary, qoǵamdyq uıym ókilderi kirdi.

Gúlshara Ábdiqalyqova quttyqtaý sózinde Qazaqstan Prezıdenti Nursultan Nazarbaevtyń «Álem. XXI ǵasyr» manıfesindegi: «Ótken ǵasyrlardyń qasiretti qatelikterin qaıtalaýǵa jol bermeı, álemdi soǵys qaterinen túpkilikti aryltý úshin úkimetterdiń, saıasatkerlerdiń, ǵalymdardyń, bıznesmenderdiń, óner qaıratkerleriniń jáne búkil álemdegi mıllıondaǵan adamnyń kúsh-jigerin jumyldyrý qajet» degen sózine nazar aýdardy.

Memlekettik hatshy turaqty jáne ádiletti qoǵam qurý úshin áıelder ekonomıka ómiriniń barlyq salasyna tolyqqandy atsalysýy qajet ekenin atap ótti.

- Búginde bizdiń elimiz Ortalyq Azııa men Aýǵanstandaǵy qaýipsizdikti qamtamasyz etýge aıryqsha kóńil bólip otyr. Biz Tájikstan men Qyrǵyzstandaǵy qaqtyǵystardy joıýǵa atsalystyq, Iran men Sırııa jónindegi kelissózder úshin alań usyndyq, - dedi Memlekettik hatshy.

Forým aıasynda Memlekettik hatshy Gúlshara Ábdiqalyqova «BUU-áıelder» uıymynyń atqarýshy dırektory, BUU Bas hatshysynyń orynbasary Fýmzıle Mlambo-Ngkýkamen jáne «Áıelder jıyrmalyǵynyń» (W20) negizin qalaýshy ári prezıdenti Gıýlden Tıýrktanmen ekijaqty kezdesýler ótkizdi. Onda ózekti áleýmettik-ekonomıkalyq jáne mádenı-gýmanıtarlyq problemalar, sondaı-aq beıbitshilik pen qaýipsizdikti nyǵaıtý maqsatymen áıelderdiń múmkindigin odan ári arttyrý, halyqaralyq jáne óńirlik bastamalar kóterýdegi rólin kúsheıtý máseleleri talqylandy.