Gúlshara Ábdiqalyqova elordadaǵy jastar teatrynyń qoıylymyn tamashalady

ASTANA. QazAqparat - Qazaqstan Respýblıkasynyń Memlekettik hatshysy Gúlshara Ábdiqalyqova elordadaǵy «Jastar» teatrynyń «...Kózime bir kórinseń, bala ǵashyq...» atty sahnalyq povesiniń qoıylymyna bardy, dep habarlaıdy Aqordanyń baspasóz qyzmeti.

Parlament depýtattary, elimizdiń mádenıet jáne óner qaıratkerleri tamashalaǵan is-shara Qazaqstan Respýblıkasy Táýelsizdiginiń 25 jyldyǵyn merekeleý aıasynda ótti. Qazaqstan Respýblıkasynyń Prezıdenti N.Á.Nazarbaevtyń «Qazaqstan Táýelsizdiginiń 25 jyldyǵyn merekeleý týraly» jarlyǵyna sáıkes, qazan aıyna «Máńgilik mura» degen ataý berilip, ol Qazaqstan halqy mádenıetiniń jetistikterine, óner men  shyǵarmashylyqtyń baǵa jetpes úlgilerine arnalyp otyr.

Kórermen nazaryna usynylǵan qoıylym kórnekti jazýshy Berdibek Soqpaqbaevtyń «Meniń atym Qoja» týyndysy negizinde qazirgi zamanǵa saı úlgide sahnalanyp, lırıkalyq áýenmen kómkerilip, keremet úılesimmen berildi.

Spektakl aldynda G.Ábdiqalyqova  respýblıkalyq  buqaralyq aqparat quraldary ókilderine suhbat berip, Memleket basshysynyń elimizdiń mádenıet salasynyń mańyzdy rólin talaı ret aıryqsha atap kórsetkenin aıtty.  Búginde elimizde  64 teatr, 234 murajaı, 4 168 kitaphana jáne 3 180 klýb jumys isteıdi.

Memlekettik hatshy «Jastar» teatrynda onyń qazirgi jumysymen, shyǵarmashylyq ujymymen jáne aldaǵy josparlarymen tanysty. Gúlshara Ábdiqalyqova elimizdiń rýhanı-mádenı ómirindegi «Jastar» teatry shyǵarmashylyq trýppasynyń  zor úlesin atap ótti.