Gúlshara Ábdiqalyqova dıpmıssııasy aıaqtalǵan Italııa Elshisin qabyldady

ASTANA. QazAqparat -Búgin Aqordada QR Memlekettik hatshysy Gúlshara Ábdiqalyqova elimizdegi dıplomatııalyq mıssııasyn aıaqtaǵaly otyrǵan Italııanyń Tótenshe jáne Ókiletti Elshisi Stefano Ravanıanmen kezdesti, dep habarlaıdy QazAqparat.

«Siz jumys istegen kezeńde jasqy nátıjelerge qol jetkizdik. Ásirese, 2015 jyly Prezıdentimizdiń Mılanǵa, EKSPO-2017 kórmesine saparyn aıryqsha atap ótkim keledi. Sol kezde kezdesýlerdi uıymdastyrýda úlken ról atqardyńyz. Árıne, osy ýaqyttyń ishinde ekonomıkalyq turǵyda baılanystarymyz qarqyndy júrdi. Italııa bizdiń ekonomıkalyq yntymaqtastyǵymyz boıynsha Eýropadaǵa eń iri seriktesterimizdiń biri», - dep atap ótti Memlekettik hatshy.

Gúlshara Ábdiqalyqova taıaýda Italııada parlamenttik saılaý ótkenin aıtty.
 

«Jańa Parlament te dıplomatııalyq korpýsymyzben belsendi jumys isteıdi dep úmit artamyz. Sonymen qatar Astanadaǵy EKSPO-2017 kórmesine qatysqandaryńyz úshin rızashylyǵymdy bildiremin. Óz pavılondaryńyzdy kórsetip, jasyl tehnologııa, energııa únemdeý salasyndaǵy ozyq jetistikterińizdi usyndyńyzdar», - dedi ol.

Memlekettik hatshy Stefano Ravanıannan Italııaǵa barǵannan keıin de Qazaqstanmen baılanysty máselelerdi sheshýge kómek beredi dep senetindigin atap ótti.

«Kún tártibinde turǵan eki máselemiz bar. Birinshiden, ózińiz biletindeı, Eýropalyq odaq elderimen keńeıtilgen seriktestik týraly kelisim bar. Qazir bul qujatty 23 el ratıfıkatsııalady. Italııa da bul kelisimdi ratıfıkatsııalaǵanyn qalaımyz. Ekinshiden, Sizdi jáne Sizdiń eldiń ókilin 2018 jyldyń qazan aıynda ótetin Álemdik jáne dástúrli dinder kóshbasshylarynyń sezine shaqyramyn», - dep atap ótti Gúlshara Ábdiqalyqova.

Aıta keteıik, Qazaqstan men Italııa arasyndaǵy taýar aınalymy 2017 jyly 9,6 mlrd dollardy qurady. 2005-2017 jyldardyń aralyǵynda Qazaqstan ekonomıkasyna salynǵan Italııanyń tikeleı ınvestıtsııasy 5,8 mlrd dollarǵa jetti. Búginde elimizde ıtalııalyqtardyń qatysýymen 228 birlesken kásiporyn jumys isteıdi.