Gúlshara Ábdiqalyqova: «Bolashaq» túlekteri ekonomıkamyzǵa aıtýly úles qosyp keledi

ASTANA. QazAqparat - Qazaqstan - «Bolashaq» sekildi jastarǵa asa paıdaly baǵdarlamany qabyldaǵan álemdegi saýsaqpen sanarlyq elderdiń biri. QR Memlekettik hatshysy Gúlshara Ábdiqalyqova «Bolashaq» halyqaralyq stıpendııasynyń 25 jyldyǵyna arnalǵan forýmda osylaı dedi, dep habarlaıdy QazAqparat tilshisi.

«25 jyl buryn Memleket basshysy «Bolashaq» baǵdarlamasyn bekitý týraly sheshim qabyldaǵan bolatyn. Odan beri stıpendııanyń kóptegen túlegi ekonomıkamyzǵa aıtýly úles qosyp keledi. Olardyń arasynda osy zalda otyrǵan ákimder men mınıstrler, kompanııalardyń ókilderi men qarjygerler otyr. Mundaı baǵdarlama Malaızııada, AQSh-ta jáne Azııanyń keıbir elderinde ǵana bar. Biz dál osyndaı baǵdarlamany qabyldaǵan az elderdiń birimiz», - dedi Gúlshara Ábdiqalyqova.

Memlekettik hatshy «Bolashaq» túlekterin aıtýly datamen quttyqtady. 

«Ómirlik tájirıbe jınaqtap jatqan jastarǵa bıik belesterdi baǵyndyrýyn tileımin. Jaýapty laýazymdy qyzmet atqaryp júrgender óz eliniń damýyna ary qaraı úles qosa bersin degen tilek bildirgim keledi», - dedi Gúlshara Ábdiqalyqova.

Aıta ketsek, buǵan deıin QR Memlekettik hatshysy Astanada ótip jatqan «Adamı kapıtal - jańǵyrý negizi» atty forýmda QR Prezıdenti Nursultan Nazarbaevtyń stıpendıanttarǵa joldaǵan quttyqtaý hatyn oqyp bergen bolatyn. Elbasy óz sózinde «Bolashaq» halyqaralyq stıpendııasy dúnıejúzine tanylǵan qazaqstandyq brendke aınalǵanyn atap ótti.