Gúlshara Ábdiqalyqova Belarýste «Slavıan bazary» festıvaliniń ashylýyna qatysty
12-14 shilde kúnderi bolǵan sapar aıasynda Gúlshara Ábdiqalyqova Belarýs Prezıdenti Ákimshiliginiń basshysy N.Kochanovamen kezdesti.
Kezdesýde óńiraralyq deńgeıdegi jáne saýda-ekonomıkalyq, mádenı-gýmanıtarlyq salalardaǵy ekijaqty ózara is-qımyl máseleleri talqylandy.
Memlekettik hatshy Qazaqstan men Belarýs arasyndaǵy taýar aınalymy 2017 jylǵy qańtar-sáýir aılarynda 160,4 mln dollar bolǵanyn jáne onyń 2016 jyldyń tıisti kezeńimen salystyrǵanda shamamen 76%-ǵa óskenin atap ótti.
Gúlshara Ábdiqalyqova Belarýs tarapyna Astanadaǵy Halyqaralyq «EKSPO-2017» mamandandyrylǵan kórmesine belsene atsalysyp jatqany úshin rızashylyq bildirdi.
N.Kochanova mártebeli meımanǵa saparmen kelip, «EKSPO-2017» kórmesi aıasynda ótetin «Áıelder bolashaq energııasy úshin» atty halyqaralyq áıelder forýmyna shaqyrǵany úshin alǵys aıtty.
Sapar aıasynda Memlekettik hatshy Gúlshara Ábdiqalyqova elder men qurlyqtardy biriktiretin iri mádenı forým - «Slavıan bazary» halyqaralyq óner festıvaliniń ashylýyna qatysty.
«Slavıan bazary» festıvali 1992 jylǵy shilde aıynda quryldy. Halyqaralyq festıval Reseı Federatsııasy men Belarýs Respýblıkasynyń gýmanıtarlyq yntymaqtastyǵyn iske asyrýǵa, kórkem mádenıet pen ónerdi jandandyrýǵa jáne onyń damýyna septigin tıgizetin uzaqmerzimdi mádenı joba bolyp sanalady.
Qazaqstan bul is-sharaǵa belsene atsalysyp, júldeli oryndarǵa ıe bolyp keledi. 2015 jyly atalǵan halyqaralyq konkýrstyń bas júldesin Dımash Qudaıbergen jeńip aldy.
