Gúlshara Ábdiqalyqova aýyldardy aralap, turǵyndardyń usynys-pikirin tyńdady

QYZYLORDA. QazAqparat - Halyqtyń ál-aýqatyn arttyrýǵa baǵyttalǵan áleýmettik máseleler kezeń-kezeńimen sheshiledi. Turǵyndar úshin ózekti bolyp tabylatyn gazben qamtý, sý jáne elektr jelisin tartý, jol sapasyn jaqsartý máselelerine udaıy mán beriledi. Búgin oblys ákimi Gúlshara Ábdiqalyqova Qyzylorda qalasynyń shetkeri aımaqtaryna baryp, turǵyndardyń talap-tilekterin tyńdady, dep habarlaıdy QazAqparat.

Oblys ákiminiń baspasóz qyzmetinen málim etkendeı, aımaq basshysy aldymen, Aqjarma aýyldyq okrýgine qarasty Taldyaral aýylyna bardy. Munda turǵyndar eski jataqhanany ıgilikke asyrý jáne mektep janynan shaǵyn balabaqsha ashý máselesin kóterdi. 1965 jyly salynǵan 2 jataqhananyń bireýiniń qazirde tozyǵy jetken. Onyń ornyna jeke kásipker ǵımaratty sporttyq nysanǵa qaıta baǵyttaýǵa usynys bildirdi. Oblys ákimi balalardyń buqaralyq sportpen aınalysýyna jaǵdaı jasaý úshin bos turǵan ǵımaratty tıimdi paıdalaný qajettigin aıtyp, aýyl ákimine tıisti jumystardy atqarýdy tapsyrdy. Al mektep janynan balabaqsha ashý usynysy eskeriletinin jáne tıisti deńgeıde qaralatynyn jetkizdi.

Munan keıin Gúlshara Ábdiqalyqova Baımurat batyr aýylynyń turǵyndarymen kezdesip, máselelerin tyńdady. Aýyl aqsaqaldary dárigerlik ambýlatorııany salý máselesin kóterip, kósheni jaryqtandyrý kerek ekenin alǵa tartty. Qajettilikti eskere kele, aýmaǵy 3000 sharshy metrdi quraıtyn ambýlatorııany salý úshin ótken jyly 3,4 mln.teńgege joba-smetalyq qujattary daıyndalyp, memlekettik saraptamadan ótkizildi. Qazirgi tańda qurylysty bastaýǵa daıyndyq jumystary júrgizilýde. Al, elektr jelisin tartý úshin tıisti qujattar ázirlengen.

Ári qaraı oblys ákimi Aqsýat aýyldyq okrýgindegi J.Mahambetov aýylyna aıaldady. 10 myńǵa jýyq turǵyny bar aýylda gaz jelisin júrgizý ózekti. Turǵyndar birneshe jyldan kógildir otynǵa qosý máselesin kóterip keledi. Aýyl aqsaqaldarymen tildesken óńir basshysy turǵyndardyń talap-tilegine oraı aýyldy kógildir otynǵa qosý jumystary eki jylda aıaqtalyp, bıyl uzyndyǵy 9 shaqyrymdy quraıtyn 5 kóshege gaz qubyry ornatylatynyn jetkizdi. Bul rette merdiger kompanııa basshysyna jumysty sapaly ári ýaqytynda oryndaýdy tapsyrdy.

Eske salaıyq, óńir basshysy osy ýaqytqa deıin 100-den asa aýylǵa baryp, turǵyndarmen kezdesti, usynys-pikirlerin tyńdady. Áleýmettik máselelerdi sheshý nátıjesinde óńirde gazben qamtý 67%, sapaly joldardyń úlesi 75%, aýyz sý júrgizý 98% jetken.