Gúlshara Ábdiqalyqova Almaty oblysynyń turǵyndarymen kezdesti
Jumys tobynyń quramyna QR Eńbek jáne halyqty áleýmettik qorǵaý mınıstri Berdibek Saparbaev, QR Bilim jáne ǵylym mınıstri Kúlásh Shámshıdınova, QR Densaýlyq saqtaý mınıstri Eljan Birtanov, Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov kirdi.
QR Premer-Mınıstriniń orynbasary men QR Eńbek jáne halyqty áleýmettik qorǵaý mınıstri jumys saparyn Taldyqorǵan qalasynyń Jumyspen qamtý ortalyǵy men Halyqqa qyzmet kórsetý ortalyǵynan bastap, mekemelerdiń jumysyn tekserdi.
2018 jyly oblysta 8294 adam jumysqa ornalastyryldy, onyń 2681-i turaqty jumys tapty, 3248 adam tólenetin qoǵamdyq jumystarǵa jiberildi. Jumyspen qamtý ortalyǵynda ataýly áleýmettik kómekti taǵaıyndaý tártibi egjeı-tegjeıli qaraldy. Birqatar naqty tapsyrmalar berildi. Taldyqorǵan qalasynyń HQO-da 2018 jyly 234 myńnan astam qujat berildi, olardyń 59% elektrondy túrde usynylǵan.
Budan keıin jumys toby Almaty oblysynyń turǵyndarymen kezdesti. Jıynǵa kópbalaly analar, az qamtylǵan otbasylar, eńbek ardagerleri, múmkindikteri shekteýli jandar, muǵalimder, dárigerler, azamattyq qoǵam ókilderi qatysty.
Gúlshara Ábdiqalyqova óz sózinde jańa áleýmettik saıasattyń negizgi baǵyttary, jumys tobynyń maqsattary men mindetteri týraly tolyǵyraq aıtyp berdi. Ol halyqtyń ál-aýqatyn jaqsartý maqsatynda qolǵa alynǵan sharalar týraly egjeı-tegjeıli baıandaı otyryp, memlekettiń basymdyǵy halyqtyń turmys deńgeıin barynsha jaqsartý ekenin atap ótti.
Zalda kóterilgen suraqtarǵa jumys tobynyń músheleri naqty ári tolyq túsinikteme berdi.
Kezdesý aıaqtalǵannan keıin Vıtse-premer tsıfrlyq saýattylyqty damytýǵa baǵyttalǵan №28 AT-lıtseı mektebine bardy. Munda 1,3 myńnan astam oqýshy bilim alyp jatyr. Mektep zamanaýı jabdyqtarmen jabdyqtalǵan. Onda ınformatıka, psıhologııa, lıngafondyq jáne mýltımedıalyq kabınetter, oqý sheberhanalary bar.
Budan keıin G. Ábdiqalyqova az qamtylǵan otbasylarmen kezdesti. 5 bala tárbıelep, balabaqshada tárbıeshi kómekshisi bolyp jumys isteıtin kópbalaly ana T. Bekberdınovanyń páterinde bolǵan Premer-Mınıstrdiń orynbarasy ataýly áleýmettik kómektiń jańa tetigin túsindirdi. Oǵan sáıkes bul otbasy endi aı saıyn 141 125 teńge alatyn bolady.
Birinshi jumys kúniniń sońynda G. Ábdiqalyqova azamattardy jeke qabyldady. Atap aıtqanda, S. Turashtyń tabysy tómen otbasynyń ótinishi qanaǵattandyryldy, ol óz úıinde tigin isin ashqysy keledi jáne qarjylandyrýǵa muqtaj. Óńir basshylyǵyna 505 myń teńge kóleminde óteýsiz grant berý máselesin sheshý tapsyryldy.
Mal sharýashylyǵymen aınalysýǵa sheshim qabyldaǵan S. Kúmisbek shaǵyn nesıe berýdi surady. Bul másele de oń sheshimin tapty - oblys basshylyǵy oǵan shaǵyn nesıe bóledi.
Jumys tobynyń basqa músheleri oblys aýdandary boıynsha saparlarda boldy. QR Densaýlyq saqtaý mınıstri Eljan Birtanov Eskeldi aýdanynda, QR bilim jáne ǵylym mınıstri Kúlásh Shámshıdınova Kóksý aýdanynda, Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov Taldyqorǵan qalasynyń jáne Tekeli qalasynyń qurylys jáne TKSh nysandary boıynsha jumys saparynda boldy.
Densaýlyq saqtaý, bilim berý nysandaryn, basqa da áleýmettik mekemelerdi, qurylys alańdaryn aralaı otyryp, aýyl turǵyndary, muǵalimder jáne dárigerlermen áńgime órbidi. Halyqtyń jeke qabyldaýy ótti, onda azamattar ózekti suraqtarǵa tolyq jaýap aldy, sonymen qatar olardyń túıitkildi problemalaryn sheshýge kómek kórsetildi.
Úkimet músheleriniń Almaty oblysyna jumys sapary jalǵasady.
Aıta keteıik, buǵan deıin QR Densaýlyq saqtaý mınıstri E. Birtanovtyń jergilikti medıtsına qyzmetkerlerimen kezdeskenin jazǵan bolatynbyz.
