Gúlshara Ábdiqalyqova aqtaýlyqtarǵa Elbasynyń áleýmettik bastamalary týraly aıtty
Jumys tobynyń quramyna Eńbek jáne halyqty áleýmettik qorǵaý mınıstri Berdibek Saparbaev, Bilim jáne ǵylym mınıstri Kúlásh Shámshıdınova, Densaýlyq saqtaý mınıstri Eljan Birtanov, QR IIDM qurylys jáne turǵyn úı kommýnaldyq sharýashylyǵy komıtetiniń tóraǵasy Marhabat Jaıymbetov, QR AShM orman sharýashylyǵy jáne janýarlar álemi komıtetiniń tóraǵasy Qaıyr Ryskeldınov, tilshiler men blogerler engen.
Gúlshara Ábdiqalyqova «Mańǵystaýmunaıgaz» AQ keńsesinde qala men aýdan ákimderiniń, kásiporyn basshylary men kásipodaq uıymdarynyń otyrysyn asha otyryp, Elbasynyń «Áleýmettik qamqorlyq» atty jańa áleýmettik sharalary júzege asyrylyp jatqanyn, ol sharalar kópbalaly analar men tabysy tómen azamattardyń áleýmettik jáne turǵyn úı máselelerin sheshýge baǵyttalǵanyn atap ótti. Osyǵan baılanysty bıznes bul jumysqa belsene aralasýy kerektigin aıtty.
Otyrys sońynda Úkimet basshysynyń orynbasary azamattardy qabyldady. Halyqty alańdatyp otyrǵan máseleler tóńireginde Gúlshara Ábdiqalyqova aımaq basshylyǵyna naqty tapsyrmalar berdi.
Jumys sapary barysynda Densaýlyq saqtaý mınıstri Eljan Birtanov 32-shi shaǵyn aýdandaǵy otbasylyq dárigerlik ambýlatorııanyń jumysymen tanysyp, medıtsınalyq qyzmet kórsetý sapasyn arttyrýdy jaqsartý máseleleri boıynsha dárigerler men patsıentterdiń qoıǵan suraqtaryna jaýap berdi. Úkimettik toptyń ózge músheleri de Aqtaý qalasynyń birqatar kásiporyndary men nysandaryn aralap, jumystyń barlyq baǵyty boıynsha jumys júrgizdi.
Sapar sońynda Gúlshara Ábdiqalyqova men jumys tobynyń músheleri Dostyq úıinde Aqtaý qalasynyń turǵyndarymen kezdesti. Jıyn barysynda qazaqstandyqtardyń ómir sapasyn arttyrý úshin, eń aldymen kópbalaly jáne az qamtylǵan, múgedek balasy bar otbasylardyń, halyqtyń áleýmettik az qamtylǵan bóliginiń ál-aýqatyn arttyrý baǵytynda memleket birshama keshendi jumystar atqarǵany aıtyldy. Kezdesýde suraqtar men ótinishter ǵana emes, «Áleýmettik qamqorlyq» bastamasyn júzege asyrýdaǵy utymdy usynystar da aıtyldy. Ásirese, kásipker Aıjan Nurlanovanyń «Aýyl - el besigi» jobasy aıasynda naqty ister jasalyp jatqanyna erekshe nazar aýdaryldy. Atalǵan kásipker Prezıdenttiń tapsyrmasyn oryndaı kele 50-ge tarta adamǵa kásipkerlik bıznes negizderin úıretken. Sonymen qatar, kásipker azamattarǵa taýyq satyp berý arqyly qus sharýashylyǵymen aınalysýǵa kómektesip, halyqty nan ónimderimen qamtamasyz etken. Kópbalaly otbasylarǵa tandyr peshin ornatyp, jyl boıy qyzanaq pen qııar ósirý amaldaryn úıretip, jylyjaılar salyp bergen.
Osylaısha, Premer-Mınıstrdiń orynbasary bastaǵan jumys tobynyń Atyraý, Batys Qazaqstan, Aqtóbe jáne Mańǵystaý oblystaryna kózdelgen jumys sapary aıaqtaldy. Úkimet músheleri aldaǵy ýaqytta qalǵan óńirlerdi aralaıtyn bolady.
