Gúlshara Ábdihalyqova jaǵdaıy tómen otbasylarǵa kórsetiletin kómekpen tanysty - Almaty oblysy
TALDYQORǴAN. QazAqparat - Almaty oblysyna jumys saparymen kelgen Úkimet basshysynyń orynbasary Gúlshara Ábdihalyqovaǵa Almaty oblysynyń «Áleýmettik kartasy» tanystyryldy, dep habarlaıdy QazAqparat tilshisi.
Oblys ákimi Amandyq Batalovtyń aıtýynsha, aımaqtaǵy áleýmettik qoldaýdy qajet etetin turǵyndardy qoldaýǵa 3 mlrd teńge kóleminde qosymsha qarjy bólingen. Bul qarajat «Áleýmettik karta» boıynsha jumsalmaq. Áleýmettik qamtý negizinde kópbalaly otbasylardy baspanamen qamtý, osy sanattaǵy áýlettiń balalarynyń joǵary bilim alýyna jaǵdaı jasaý, jumyspen qamtý sııaqty sharalar júzege asyrylýda.
«Oblys ortalyǵynda kóp balaly otbasylar úshin kóp qabatty eki úıdiń jobasyn ázirleý jumysy bastaldy, kottedj qalashyǵynan da úı bólý múmkindikteri qarastyrylýda. Sondaı-aq, «7-20-25» baǵdarlamasy boıynsha da quny 1 mln teńge bolatyn turǵyn úı sertıfıkatyn berýdi bastadyq. Qazirgi quny sertıfıkattyń jıyntyq qory 300 mln teńgege jetti», - dedi «Áleýmettik kartany» tanystyrý barysynda oblys ákimi Amandyq Batalov.
Al az qamtylǵan jáne kóp balaly otbasylarynyń balalaryna joǵary oqý oryndarynda bilim alýy úshin bólinetin grant sanyn taǵy da júzge kóbeıtý kózdelýde. Bul maqsatqa 44,3 mln teńge qarjy qarastyrylǵan. Qazir de oblys ákiminiń arnaıy granty boıynsha 246 stýdent túrli oqý oryndarynda bilim alyp jatyr. Az qamtylǵan otbasylar balalary úshin mektepte ystyq tamaqpen qamtý 100 protsentke jetti. Búginde oblys aýmaǵyndaǵy mektepterde 32 myń bala tegin ystyq tamaqpen, mektep formasymen, jazǵy demalys kezindegi demalys lagerimen qamtamasyz etildi.
«Áleýmettik karta» boıynsha endi Taldyqorǵan qalasynda turatyn kópbalaly analar qoǵamdyq kólikte tegin júredi. Buǵan deıin osyndaı tegin jol júrý múmkindigin oblys ortalyǵyndaǵy 42 myń mektep oqýshysy men stýdentter paıdalanyp kelgen bolatyn. Qazir oblys aýmaǵynda kógildir otyn kózine qosylý qarqyndy júrip jatyr. Tabıǵı gazǵa qosý isi boıynsha da áleýmettik jaǵynan az qamtylǵan otbasylaryna jeńildik qarastyrylyp otyr eken. Bul maqsatqa qazynadan 500 mln teńge bólingen.
Jalpy Úkimet músheleriniń nazaryna usynylǵan Jetisýdyń «Áleýmettik qorǵaý» kartasy oblystaǵy 253 aýyldyq okrýg turǵyndarynyń áleýmettik jaǵdaıyn zerdeleý negizinde jasaldy. Qazir aýdandar boıynsha bul tizim jetildirilip, «E-Halyq» aqparattyq júıesine qosylýda. Sondaı-aq, barlyq aýdanda kópbalaly jáne az qamtylǵan otbasylaryna «Bir tereze» qaǵıdatymen qyzmet kórsetetin ortalyqtar ashylýda.
