Gúlnár Karımovanyń taǵy 182 mıllıon dollarlyq aktıvi Ózbekstanǵa qaıtarylady
TAShKENT. KAZINFORM – 6 aqpanda Tashkentte Ózbekstannyń ádilet mınıstri Akbar Tashkýlov pen Shveıtsarııanyń Ózbekstandaǵy tótenshe jáne ókiletti elshisi Konstantın Obolenskıı «Tárkilengen múlikti bólý týraly kelisimge» qol qoıdy, dep habarlaıdy Ózbekstan ádilet mınıstrligi.
«Kelisim aıasynda Ózbekstanǵa shamamen $182 mln qarajat qaıtarylady. Bul qarajatty Ózbekstan Respýblıkasynyń keıbir azamattary zańsyz ıemdengen jáne olar 2012 jyly Shveıtsarııa bas prokýratýrasy G.Kárimovaǵa qarsy qozǵalǵan qylmystyq istiń aıasynda tolyǵymen tárkilengen», - delingen habarlamada.
Qarajat Birikken Ulttar Uıymynyń Uzbekistan Vision 2030 kóp seriktestik trast qory arqyly qaıtarylady.
Aıta keteıik, budan buryn, 2022 jyldyń 16 tamyzynda Shveıtsarııanyń Bern qalasynda Ózbekstan Respýblıkasy men Shveıtsarııa Konfederatsııasy arasynda «Shveıtsarııa Konfederatsııasynyń aýmaǵynda tárkilengen zańsyz alynǵan múlikti Ózbekstan Respýblıkasy halqynyń múddeleri úshin qaıtarý ádisteri týraly kelisimge» qol qoıylǵan bolatyn. Bul kelisim BUU-nyń Uzbekistan Vision 2030 dep atalatyn kóp seriktestik trast qory arqyly zańsyz alynǵan aktıvterdi Ózbekstanǵa qaıtarý mehanızmin, sondaı-aq negizgi qaǵıdattar men maqsattardy belgileıdi.
Osy jumys aıasynda 2022 jyldyń tamyzynda qol qoıylǵan birinshi kelisim Ózbekstanǵa shamamen 131 mıllıon dollar qaıtarýdy kózdeıdi. Jańa kelisimge qol qoıylǵannan keıin Ózbekstan halqynyń ıgiligine qaıtarylǵan qarajattyń jalpy kólemi 313 mıllıon dollarǵa jetedi.
Uzbekistan Vision 2030 arqyly qaıtarylǵan qarajat Ózbekstan halqynyń ıgiligi úshin áleýmettik mańyzy bar jobalardy júzege asyrýǵa, atap aıtqanda, densaýlyq saqtaý jáne bilim berý salalaryna baǵyttalady. Qor jáne onyń jobalary týraly aqparat qordyń saıtynda ózbek jáne aǵylshyn tilderinde ashyq kózde qoljetimdi.
Eske sala keteıik, Shveıtsarııa Gúlnár Karımovanyń 370 mln dollar aktıvin tárkiledi.