Gúlnár Bajkenovaǵa qatysty qylmystyq is qozǵaldy

ALMATY. KAZINFORM — Almaty polıtsııa departamenti Orda.kz bas redaktory Gúlnár Bajkenovanyń ústinen birneshe ret ádeıi jalǵan aqparat taratty degen derek boıynsha qylmystyq is qozǵalǵanyn habarlady. 

— Túsken aryzdar boıynsha O. resýrsynyń bas redaktory, azamatsha B.-ǵa qatysty birneshe ret jáne qasaqana jalǵan aqparat taratý deregi boıynsha qylmystyq ister tirkeldi, — dep habarlady polıtsııa departamentiniń baspasóz qyzmeti.

Vedomstvonyń málimetinshe, tergeý áreketteri aıasynda aryzdanýshylardyń keltirgen ýáji muqııat tekserilip jatyr. Aldyn ala málimet boıynsha, 2024 jylǵy bir jazbada quqyq qorǵaý organynyń qyzmetkeri para alǵan kezde ustaldy degen jalǵan aqparat taraǵan.

— Munyń shyndyqqa janaspaıtyny anyqtaldy. Osylaısha, B.-nyń áreketi bul qyzmetkerdiń kásibı bedeline nuqsan keltirip, qoǵamda onyń qyzmetine qatysty jalǵan pikir qalyptastyrdy. Basqa bir jazbada da múlik daýyna qatysty keltirilgen zalaldyń kólemi men sebepteri týraly burmalanǵan ári shyndyqqa sáıkes kelmeıtin derekter jarııalanǵan. Bul da qoǵamdy jańylystyryp, aryzdanýshynyń iskerlik bedeline aıtarlyqtaı zardap keltirgen, — dep habarlady polıtsııa.

Buǵan qosa, ótken jyldardaǵy basqa da jarııalanymdarǵa qatysty zardap shekkenderdiń ótinishi boıynsha tergeý júrip jatyr. Bul materıaldar da jalǵan nemese qoǵamdy adastyrýy múmkin degen kúdik bar.

Azamatsha B.-nyń turǵylyqty jeri men jumys ornynda tergeý áreketteri júrgizilip jatyr. Jarııalanǵan jalǵan málimetterdiń daıyndalýy men taralýyn anyqtaý úshin elektrondy qurylǵylar men materıaldar alynyp jatyr.

Tergeý jalǵasyp jatyr. Barlyq mán-jaı zań aıasynda anyqtalady. 

Aıta ketelik Almatyda jańa týǵan nárestelerdi saýdalaý isi boıynsha tergeý júrip jatqany týraly jazǵan edik.