Gúlmıra Satybaldy aıyptaýlarmen kelispeıtinin aıtyp, ádil sheshim qabyldaýdy surady
«Men aıyptaýmen kelispeımin. Meniń is-áreketimde Qylmystyq kodekstiń 389-babynyń 4-bóliginde kózdelgen ózdiginen basqarý qylmystyq quramy joq dep sanaımyn. Bastapqyda BAQ oqıǵany birjaqty, burmalanǵan túrde jarııalady. Kezinde maǵan jaqyn bolǵan jáne qurmet kórsetken adamdardyń sot protsesinde jalǵan aqparat berip jatqanyna tań qaldym. Buǵan deıin aıtqanymdaı, Alagózov zańsyz túrde jábirlenýshi bolyp otyr. Óıtkeni, ol aktsııalardyń ıesi emes. Men T. Alagózovpen jáne onyń áıeli Baıanmen ustalǵanǵa deıin jaqyn qarym-qatynasta boldym. Olar meniń úıimde qonaqta boldy. Munyń bári men qamaýǵa alynǵanǵa deıin boldy. Men olardy dostarym dep sanaǵam», - dedi Gúlmıra Satybaldy sotta.
Sottalýshy «kúsh qoldanyp, kompanııany tartyp aldy» dep taǵylǵan aıypty da moıyndamaıtynyn aıtty.
«Maǵan «kompanııany tartyp aldy jáne moraldyq kúsh kórsetti» degen aıyp taǵylyp otyr. Men kompanııany qalaı tartyp alǵam, eger ony Rıvshanov pen Berdiqulov basqaryp otyrsa? Kompanııanyń aktsılary da solarǵa tıesili. Kompanııa aktsııalary Alagózovke tıesili dep eshkim aıtqan emes. Sonymen qatar, prokýror men Alagózov meni Qazaqstannyń sot júıesine jáne quqyq qorǵaý organdaryna ákimshilik ári saıası yqpal etti dep aıyptady. Taǵy da qaıtalaımyn, meniń Qaırat Satybaldymen ajyrasqanyma 20 jyldan asty jáne eshqashan saıası yqpal etken emespin. Olaı bolsa, men ákimshilik jáne saıası yqpal etken sýdıalardan, saıası qaıratkerlerden de jaýap alynsyn», - deıdi sottalýshy.
Sondaı-aq, Gúlmıra Satybaldy is boıynsha ádil sheshim shyǵarýdy surady.
«Men buǵan deıin «óz betinshe basqarý» boıynsha kinámdi ishinara moıyndadym. Biraq, men eshqashan Mekeshevany urlaýǵa buıryq bergen emespin. Sondaı-aq, sottan Mádı Batyrshaev pen Rashıd Ótebekovti aqtaýdy suraımyn. Olardyń esh kinási joq. Sonymen qatar, sottan zalaldyń ótelýin eskere otyryp, zańdy jáne ádil sheshim shyǵarýdy suraımyn», - dep tolyqtyrdy G. Satybaldy.
Eske salaıyq, Gúlmıra Satybaldy kásiporyndardyń qatysý úlesin zańsyz ıemdený, sonyń ishinde adam urlaýmen ushtasqan eki fakti boıynsha tergeýge alynǵan edi. Jábirlenýshige kelgen zalal somasy – 6,6 mlrd teńgeden asady.
Sondaı-aq, Gúlmıra Satybaldynyń sotqa deıingi tergeý kezinde shekara asyp ketpek bolǵany belgili boldy.
Ol sotta aıybyn ishinara ǵana moıyndady.
Aıta ketsek, prokýror Gúlmıra Satybaldyny 8 jylǵa bas bostandyǵynan aıyrýdy suraǵan edi.
