Gúlmıra Satybaldynyń isi: jábirlenýshiler 11,5 mlrd teńge moraldyq jáne materıaldyq shyǵyn óndirip almaq

ALMATY. KAZINFORM — Almatyda Gúlmıra Satybaldanyń isi boıynsha ótip jatqan sot protsesinde jábirlenýshiler moraldyq jáne materıaldyq shyǵyndy óndirýdi talap etip, azamattyq is qozǵaýǵa ótinish jasady.

Zardap shekken kásipker Abaı Júnisovtiń advokaty Rashıd Teńizbaev aıyptalýshy Gúlmıra Satybaldy men Mádı Batyrshaev 2019 - 2021 jyldar aralyǵynda kompanııadaǵy senimdi adamdar arqyly Júnisovtiń aktsııalaryn zańsyz ıemdengenin aıtty.

Osylaısha, sottalýshylar zańsyz áreketterimen Abaı Júnisovke jalpy somasy 2,6 mlrd teńge materıaldyq shyǵyn keltirgen. 

Budan bólek, advokat Júnisovtiń moraldyq shyǵyny 8,3 mlrd teńge ekenin tilge tıek etti.
Taǵy bir jábirlenýshi Qasym Júnisov sottalýshylardyń keltirgen moraldyq shyǵyny - 333 mln teńge ekenin jetkizdi.

Al, jábirlenýshi Altaı Júnisov sottan 209 mln teńge kóleminde materıaldyq shyǵyn óndirip alýdy surady.

Túsirilgen shaǵymnyń jalpy sommasy 11,5 mlrd teńge boldy. Satybaldy men Batyrshaev talaptarmen kelispedi. 

Osyǵan deıin Gúlmıra Satybaldynyń advokaty sýdıany aýystyrýdy talap etken bolatyn. 

Gúlmıra Satybaldy isi boıynsha sot tergeýi 19 tamyz kúni aıaqtaldy. 

Eske salaıyq, buǵan deıin kásipker Abaı Júnisov Gúlmıra Satybaldy birlesken seriktestikte urlyq jasady degen kúdikpen kinásin moıyndaýdy talap etip, 2019 jyldyń aqpanynan beri úıinde zańsyz qamaýda ustaǵanyn aıtqan edi.

Sot otyrysy kezinde Gúlmıra Satybaldy ózine taǵylǵan aıyppen kelispeıtinin málimdedi. 

Byltyr Gúlmıra Satybaldy bireýdiń múlkin ıemdený jáne jymqyrý qylmystyq isi boıynsha 7 jylǵa bas bostandyǵynan aıyryldy.