Gúlmıra Satybaldynyń isi: sýdıa jábirlenýshini sot zalynan shyǵaryp jiberdi

ALMATY. KAZINFORM - Sýdıa Gúlmıra Satybaldy isinde jábirlenýshini sot zalynan shyǵaryp jiberdi.

«18 shilde kúni Gúlmıra Satybaldyǵa qatysty sot protsesi barysynda jábirlenýshi kýáger Rodıonov pen sottalýshy Batyrshaevpen sózge kelip, tártip buzǵany úshin sot zalynan shyǵaryldy. Qylmystyq-protsestik kodekstiń 346-babyna sáıkes, sot otyrysynda tártip buzylyp, tóraǵalyq etýshiniń ókimine baǵynbaǵan jaǵdaıda, sýdıa ol adamdy sot zalynan shyǵaryp jiberýge quqyly», - dedi sýdıa Mártpek Kákimjanov.

Sýdıa Abaı Júnisovtiń buryn mundaı zańbuzýshylyqqa jol bermegenin eskerip, ony sot protsesi aıaqtalǵansha emes, 22 jáne 25 shildede ótetin eki otyrysqa ǵana shettetý týraly sheshim qabyldady.

Jábirlenýshiniń advokaty Rashıd Teńizbaev qorǵaýyndaǵy taraptyń atynan keshirim surady.

«Abaı Qadyruly sot protsesine qatysýshylardan sottan óziniń is–áreketi úshin keshirim suraǵysy keldi. Onyń júıkesi syr berdi. Árıne, mundaı minez-qulyqqa jol berýge bolmaıdy, biz quqyqtyq memlekette ómir súremiz; Bul másele qoldanystaǵy zańnama aıasynda sheshilýi tıis. Ol bolǵan jaǵdaıǵa ókinedi jáne bul endi qaıtalanbaıdy», - dep túsindirdi advokat.

Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldy men onyń burynǵy júrgizýshisi Mádı Batyrshaevqa qatysty sot otyrysy jalǵasyp jatyr.

Buǵan deıin kásipker Abaı Júnisov Gúlmıra Satybaldy birlesken seriktestikte urlyq jasady degen kúdikpen kinásin moıyndaýdy talap etip, 2019 jyldyń aqpanynan beri úıinde zańsyz qamaýda ustaǵanyn aıtqan edi.

Aıta keteıik, aldyn ala tyńdaý kezinde, aıyptalýshy G. Satybaldy alqabıler sotyna qatyspaıtynyn jetkizgen bolatyn.