Gúlmıra Satybaldynyń isi: sotta jábirlenýshiniń júrgizýshisi sóz aldy
ALMATY. KAZINFORM – Gúlmıra Satybaldyǵa qatysty sot otyrysynda jábirlenýshi Abaı Júnisovke 12 jyl júrgizýshi bolǵan kýáger Ernar Muratov jaýap berdi.
Basty kýágerlerdiń biri E.Muratov Abaı Júnisovtiń qaramaǵynda 2007-2019 jyldar aralyǵynda jumys istegenin aıtty.
2019 jyldyń 13 aqpanynda A.Júnisov pen Ǵ.Satybaldy arasynda janjal týyndaǵan kezde ol Qyzylorda qalasynda issaparmen júrgen.
«Іssaparda júrgenimde Meıram telefon soǵyp, 13 aqpanǵa qaraǵan túni úıge Abaı Júnisovpen birge Gúlmıra Satybaldy men Mádı Batyrshaev kelgenin aıtty. Ony úıden shyǵarmaýǵa jáne úıge eshkimdi kirgizbeý týraly buıryq bergen. Sodan Abaı Júnisovke habarlastym, biraq telefony óshirýli eken. Men 15 aqpanda Almatyǵa oraldym, sodan keıin kólikti qaıtaryp, biraz zattaryn tastap ketý úshin Abaı Júnisovtiń úıine bardym. Sodan sporttyq forma kıgen jigitterdi de, júrgizýshi Mádı Batyrshaevty da kórdim. Úıge jolatpady. Endi maǵan Gúlmıra Satybaldy buıyryq beretinin jetkizdi.Sonymen qatar, Gúlmıranyn aıtqanyn buljytpaı oryndaý kerektigimdi basa aıtty. Sol kúni úıge kirgizbedi», - deıdi ol.
Ol bolashaqta olardy úıge Batyrshaevtyń ruqsatymen ǵana kirgizetinin aıtty.
Kýágerdiń sózinshe, 17 aqpan kúni keshke G.Satybaldy oǵan telefon soǵyp, qoqan-loqy kórsetken. Astanaǵa «KazGerStroı» JShS («Bereke Astana Grýpp» JShS quryltaıshysy) keńsesine kelýge buıryq bergen.
Ernar Muratov «Bereke Astana Group» JShS zańdy 60 paıyzy ózine (30 paıyzy A. Júnisovke, 30 paıyzy G. Satybaldyǵa), taǵy 40 paıyzy basqa adamǵa tıesili ekenin atap ótti.
«2017 jyly A.Júnisov osy seriktestiktiń bir bóligin meniń atyma ýaqytsha tirkeýimdi ótindi, óıtkeni men onyń senimdi ókili boldym. Sodan kelistim. Bul sheshimdi keıin Gúlmıra Satybaldy da qoldady», - deıdi E.Muratov.
Ol 18 aqpanda Astanaǵa ushyp kelip, «QazGerStroı» keńsesine barǵanyn atap ótti.
«Ofıste Gúlmıra Satybaldyny kórdim. Ol dórekilik tanytyp meniń bastyǵym aqshany urlaǵanyn, sondyqtan men kompanııanyń 60%-yn ol ataǵan adamǵa aýdarýym kerek dedi. Sonda men Abaı Júnisov bul týraly bile me dep suradym, biraq ol Abaı qazir eshkim emes, bári onyń qalaýymen bolatynyn aıtyp, Abaı jaqynda túrmege túsetinin jetkizdi. Ol: «Eger kelispeseń, túrmege túsesiń», - dedi. Biraz ýaqyttan keıin keńsege notarıýstyń ókilderi keldi, men sol jerde Mırhat Qasymbaevtyń atyna úlesti jazyp berdim, onyń ornyna eshteńe almadym», - dep qosty ol.
Osyǵan deıin Vaur Kazakhstan kompanııasynyń burynǵy basshysy sotta kýálik ettiken bolatyn.
Sonymen qatar jábirlenýshi, Abaı Júnisov olardy shyndyq detektorymen tergeý júrgizgenin jetkizgen edi.
Aldynǵy sot otyrysynda kásipker Abaı Júnisovtiń aǵasy Altaı Júnisov sóılegen bolatyn.
Eske salaıyq, Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldyǵa qatysty sot otyrysy ótip jatyr. Onymen birge onyń kómekshisi ári júrgizýshisi Mádı Batyrshaev ta otyr.
