Gúlmıra Satybaldyǵa qatysty taǵy bir qylmystyq is tergelip jatyr

ASTANA. KAZINFORM – Aqparatty Sybaılas jemqorlyqqa qarsy is-qımyl agenttigi rastady. 

- Qazaqstan Respýblıkasy Sybaılas jemqorlyqqa qarsy is-qımyl agenttigi (Sybaılas jemqorlyqqa qarsy qyzmet) Satybaldy Ǵ.Q. jáne basqa da tulǵalarǵa qatysty «VOSTOCHKA» kópfýnktsıonaldy turǵyn úı keshenin salý kezindegi zańsyz áreketter faktisi boıynsha qylmystyq isti tergep jatqanyn habarlaımyz, - delingen agenttik tilshisiniń saýalyna bergen jaýabynda.

Qylmystyq-protsessýaldyq kodekstiń 201-babyna sáıkes, tergeý múddesine qatysty ózge de málimetter jarııalanbaıdy.

Eske sala ketsek, 2024 jyldyń tamyzynda sot kásipker Qaırat Satybaldyulynyń burynǵy zaıyby Gúlmıra Satybaldyny úsh bap: bas bostandyǵynan zańsyz aıyrý, bopsalaý jáne ozbyrlyq boıynsha kináli dep tanyǵan bolatyn.

Ol múlki tárkilenip, 12 jylǵa bas bostandyǵynan aıyryldy. Onyń kómekshisi ári júrgizýshisi Mádı Batyrshaev ta zańsyz bas bostandyǵynan aıyrý úshin kináli dep tanylyp, 9 jylǵa sottaldy.

2023 jyldyń kókteminde Gúlmıra Satybaldy men onyń qaramaǵyndaǵylarǵa taǵy bir is boıynsha úkim shyqty. Ol úsh bap boıynsha 7 jylǵa sottaldy. Onymen birge Mádı Batyrshaev ta 7 jylǵa bas bostandyǵynan aıyryldy.