Gúlmıra Satybaldy úleskerlerge tıesili 450 mln teńgeni týysqanyna aýdarǵan

ALMATY. KAZINFORM — Almatyda Gúlmıra Satybaldyǵa qatysty sot protsesi jalǵasyp jatyr. Búgin «Baur Kazakhstan» AQ bas esepshisi Anar Baıdáýletovadan jaýap alyndy.

Kompanııada kýáger 2018 jyldan 2019 jyldyń mamyryna deıin býhgalter bolyp jumys istegen.

Al, 2020 jyldyń qańtarynda Gúlmıra Satybaldy ony «Premer-NS» JShS qarjy dırektory retinde jumys isteýge shaqyrǵan. 

Jaýap alý kezinde prokýror odan «TM Engineering Group» JShS esepshotynan «Galanz Bottlers» AQ paıdasyna 600 mln teńge aýdarylǵany jaıynda jábirlenýshi Abaı Júnisov bildi me?» dep surady. 

«Ol jaǵyn bilmeımin. Ol kezde Astanada issaparmen júrgenmin. Maǵan Qabenov pen Mekesheva telefon soǵyp, „TM Engineering“ JShS-nen 450 mln teńge jiberip, baqylaýdy tapsyrdy. Sodan keıin men Mekeshevadan „nege úleskerlerdiń aqshasyn jiberýim kerek?“ dep suradym. Ol aqsha qaıtarylatynyn jáne Gúlmıra Satybaldynyń nusqaýy ekenin jetkizdi. 450 mln teńgeni Shymkent qalasyndaǵy tsement zaýytyna, Gúlmıra Satybaldynyń týysyna jiberdik. Bul naqty esimde», — dedi kýáger. 

Aıtýynsha, atalǵan qomaqty qarjy astanalyq turǵyn úı keshenderiniń biriniń úleskerlerine tıesili.

Osyǵan deıin kýágerlerden jaýap alý kezinde aıyptalýshy tarap týystarynyń biri uıyqtap ketip, oryndyqtan qulap túskenin jazǵan edik. 

Sondaı-aq kásipker Abaı Júnisov Gúlmıra Satybaldy birlesken seriktestikte urlyq jasady degen kúdikpen kinásin moıyndaýdy talap etip, 2019 jyldyń aqpanynan beri úıinde zańsyz qamaýda ustaǵanyn aıtty. 

Byltyr Gúlmıra Satybaldy bireýdiń múlkin ıemdený jáne jymqyrý qylmystyq isi boıynsha 7 jylǵa bas bostandyǵynan aıyrylǵan bolatyn. 

Eske salaıyq, Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldyǵa qatysty sot otyrysy ótip jatyr.

Onymen birge onyń kómekshisi ári júrgizýshisi Mádı Batyrshaev ta aıyptalyp otyr.