Gúlmıra Satybaldy isi: jábirlenýshiniń baýyry barlyq múlkin qalaı bergenin aıtty
ALMATY. KAZINFORM – Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldyǵa qatysty sot otyrysy jalǵasyp jatyr. Oǵan kásipkerdi zańsyz túrmege qamap, asa iri kólemde aqsha bopsalady degen aıyp taǵyldy.
Sot otyrysynda taǵy bir jábirlenýshi, kásipker Abaı Júnisovtiń aǵasy Altaı Júnisov sóz aldy.
Altaı Júnisov 2019 jyly 14 aqpanda inisin Gúlmıra Satybaldy men onyń kómekshileri anasynyń úıinen kúshtep alyp ketkenin estigen. Sondaı-aq ol birneshe kúnnen keıin Abaı Júnisovtiń zańsyz ustalǵanyn jáne kompanııa qarjysyn jymqyrdy dep aıyptalǵanyn bilgenin atap ótti.
«Osydan keıin Baur Kazakhstan AQ-nyń zańgeri Dinmuhamed Jumadilda maǵan telefon soǵyp, Gúlmıra Satybaldy aǵamyzdyń bostandyqqa shyqqanyn qalasaq, múlkimizdi kepilge qoıýdy talap etip otyrǵanyn aıtty. Baýyrym ekeýmiz aqyldastyq, óıtkeni bul jerde meniń múlkim ǵana emes, aǵam men anam týraly da sóz boldy. Úıler men kólikterdiń qujattary jaıynda áńgime órbidi. Biz jaǵdaıdyń ýshyǵatynyn bilmegendikten, shartpen kelisý týraly sheshim qabyldadyq», - dedi ol.
Keıin Altaı Júnisov kúıeý balasymen birge kompanııa keńsesinde Gúlmıra Satybaldymen kezdesip, mán-jaıdy bilýge tyrysty. Biraq, onyń aıtýynsha, ol olardy tyńdamaı, Abaı Júnisovti aqsha urlady dep aıyptaýdy jalǵastyryp, barlyq múlikti qaıta jazýdy talap etken.
«Jaǵdaı sonshalyqty ýshyǵady dep oılamadyq. Biz onymen 20 jyldan astam ýaqyt aralasqandyqtan, ol ýaqyt óte oıynan bas tartady dep oıladyq. Óıtkeni, aramyzda dostyq jáne týystyq qarym-qatynas boldy», - dep qosty ol.
Birneshe kúnnen keıin Altaı Júnisovke belgili bir Kazımırov (lombard ıesi – avtordyń eskertpesi) telefon soǵyp, Almatydaǵy Jarokov kóshesinde ornalasqan notarıýsqa kelýin suraıdy.
«Qalqaman yqshamaýdanyndaǵy úıim balamnyń atyna tirkelgendikten, otbasym – áıelim men ulymmen keldim. Buǵan deıin Baur Kazakhstan zańgeri muny aǵamyzdyń bostandyǵy úshin jasaýymyz kerek ekenin jáne bári sheshilgenin aıtqan bolatyn. Biz notarıýsqa kelgende bárin daıyndap qoıypty. Buryn meniń úıim 100 mıllıon teńgege baǵalanǵan, biraq nesıelik kelisim-shart 50 mıllıonǵa jasalǵan. Bizge qol qoıý ǵana qaldy. Sodan Kazımırov qolma-qol 50 mıllıon teńge ákelip, Baur Kazakhstan prezıdenti Qabenovty shaqyryp, aqshasyn berdi. Men ony qolyma ustamadym. Protsess tez ótti. Odan aqshany alǵany týraly qolhat jazyp berýin ótindim. Aqshany Gúlmıra Satybaldyǵa beretinin aıtyp, qolhat berdi», - deıdi Altaı Júnisov.
Prokýrordyń májbúrli mámile jasalǵannan keıin quqyq qorǵaý organdaryna nege júginbedińder degen suraǵyna Altaı Júnisov bul adamdarmen týystyq baılanys bolǵanyndyqtan aryzdanbaǵanyn aıtty.
«Mundaı jaǵdaı bolady dep oılamadyq. Gúlmıra Satybaldyǵa jaýlyǵymyz bolǵan joq. Onyń aıtqanynyń bárin oryndasaq, ıaǵnı bar dúnıe-múlkimizdi jazyp bersek, aǵamyzdy bosatyp, bári tez bitedi dep oıladyq, biraq bári kerisinshe boldy. Bizdi aǵamnyń úıine kirgizbedi», - dedi ol.
Sondaı-aq ol Gúlmıra Satybaldynyń qoqan-loqqylarynyń aýyr bolǵany sonsha, aǵasy óz-ózine qol jumsaǵysy kelgen.
Eske salaıyq, Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldyǵa qatysty sot otyrysy ótip jatyr. Onymen birge onyń kómekshisi ári júrgizýshisi Mádı Batyrshaev ta otyr.
