Gúlmıra Satybaldy isi: kásipker Abaı Júnisov Qaırat Satybaldymen baılanysy týraly aıtty

ALMATY. KAZINFORM – Almatyda Gúlmıra Satybaldy isi boıynsha ótip jatqan sot barysynda jábirlenýshi kásipker Abaı Júnisov 2002 jyly aıyptalýshynyń burynǵy kúıeýi Qaırat Satybaldymen qalaı birge jumys istegenin aıtyp berdi.

«Mysaly, zııatkerlik mektepterdi salýǵa «Arııa Jańa Astana» kompanııasyna bir kelisimshart aldyq. Sol kezde, esimde, ol Qaırat Satybaldyulyna júgindi, olar birge premer-mınıstrdiń orynbasaryna baryp, qurylysty bizdiń kompanııa salýyn ótindi. Men muny ákimshilik resýrs dep sanaımyn», - dedi kásipker.

Sondaı-aq ol bir kezderi Qaırat Satybaldyulymen birge jumys istegenin atap ótti.

«2002 jyl edi. Ol kezde Gúlmıra Satybaldy ekeýi resmı nekede bolatyn. Qaırat meni Almatyǵa shaqyrdy. Ol kezde men «Astana-Fınans» kompanııasynda jumys isteıtinmin. Ol «Meniń Qazaqstanym» partııasy men «Naýryz bank» sekildi birqatar jobalary bar ekenin, sonymen qatar «Dáýir» baspa kesheni men «Kitap» kitap fabrıkasy sııaqty jekeshelendirilgen birqatar aktıvteri baryn jetkizdi. Ol meni osy kompanııalarda týyndaǵan jaǵdaıdy «sheshýge» kómektesýge shaqyrdy», - dedi Abaı Júnisov

Aıtýynsha, ol krızıs-menedjeri retinde shaqyrylǵan.

«Men bul kompanııalardy 12-15 aıdyń ishinde jaryqqa shyǵaryp, barlyq problemalyq máselelerdi sheshe aldym. Sol jerden men osy kompanııada jumys istegende mol bonýs alý úshin múmkindiginshe barymdy saldym. Nátıjıesinde, orasan zor jumys atqaryldy. Aqyrynda kompanııa Satybaldyulynyń anasyna berildi», - dedi Abaı Júnisov.

Jábirlenýshiniń sózinshe, biraz ýaqyttan keıin ol kompanııadan ketken.

«Men ol jerden is júzinde eshteńesiz kettim. Men kóp is atqarǵandyqtan, ol meni qarjylaı marapattaıdy dep oıladym. Biraq, ókinishke oraı, men eshteńe almadym. Sodan keıin jeke kásip ashtym. Osydan keıin Gúlmıra maǵan qaıtyp kelip, menimen jumys istegisi keletinin aıtty. Men kelistim. Biraq osynyń bári bolǵan soń men qatty ókindim. Sońynda men mine, sot zalynda turmyn», - dedi ol.

Buǵan deıin kásipker Abaı Júnisov Gúlmıra Satybaldy birlesken seriktestikte urlyq jasady degen kúdikpen kinásin moıyndaýdy talap etip, 2019 jyldyń aqpanynan beri úıinde zańsyz qamaýda ustaǵanyn aıtqan edi.

Aıta keteıik, aldyn ala tyńdaý kezinde, aıyptalýshy G. Satybaldy alqabıler sotyna qatyspaıtynyn jetkizgen bolatyn.

Esterińizge sala keteıik, byltyr Gúlmıra Satybaldy bireýdiń múlkin ıemdený jáne jymqyrý qylmystyq isi boıynsha 7 jylǵa bas bostandyǵynan aıyryldy.

Sondaı-aq sot oǵan 10 jyl boıy kommertsııalyq uıymdarda basshylyq laýazymdardy atqarýǵa tyıym saldy.

Gúlmıra Satybaldy kásiporyndardyń qatysý úlesin zańsyz ıemdený, sonyń ishinde adam urlaýmen ushtasqan eki fakti boıynsha tergeýge alynǵan edi. Jábirlenýshige kelgen zalal somasy – 6,6 mlrd teńgeden asady.

Sondaı-aq, Gúlmıra Satybaldy sotqa deıingi tergeý kezinde shekara asyp ketpek bolǵan.

Gúlmıra Satybaldy aıyptaýlarmen kelispeıtinin aıtyp, ádil sheshim qabyldaýǵa ótinish jasaǵan bolatyn.