Gúlmıra Satybaldy isi boıynsha jábirlenýshi kýáger retinde sóıledi

ALMATY. KAZINFORM – Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldyǵa qatysty sot otyrysy ótip jatyr. Іs boıynsha jábirlenýshi Abaı Júnisov kýálik berdi.

Kásipker Abaı Júnisov Gúlmıra Satybaldy birlesken seriktestikte urlyq jasady degen kúdikpen kinásin moıyndaýdy talap etip, 2019 jyldyń aqpanynan beri úıinde zańsyz qamaýda ustaǵanyn aıtty.

Bir aıǵa jýyq «úıqamaqta» bolǵannan keıin kásipker Qaırat Satybaldyulynyń Almatydaǵy Kaisar Plaza bıznes ortalyǵyndaǵy keńsesine jetkizilgen.

«Mende qorqynysh boldy. Onda meni ne kútip turǵanyn bilmedim. Kabınetke kire sala Gúlmıra Satybaldy bul bizdiń sońǵy kezdesýimiz bolýy múmkin ekenin aıtty. Meni Qaırat Satybaldynyń keńsesi ornalasqan joǵarǵy qabatqa apardy. Onyń maǵan aıtqan alǵashqy sózi ádepsiz sózder boldy... Sosyn Gúlmıra kirip, taǵy da meni aqsha jymqyrdy dep aıyptaı bastady. Men bul meniń kinám emes ekenin túsindirdim. Sodan Qaırat meni tar kabınetke kirgizip, urlyqqa qatysym bar ma dep suraı bastady. Men tazamyn, meni negizsiz aıyptaıdy dep jaýap berdim. Eger birdeńe tapsa, qyzylǵa qyzyl, qaraǵa qaramen sheshetinderin aıtty. Basqa jaqqa qashyp ketsem, jerdiń túbinen sýyryp alatynyn aıtty», - deıdi jábirlenýshi.

Aıtýynsha, Q.Satybaldyuly urlyq deregin anyqtaý úshin óz qyzmetkerlerine kompanııaǵa tekserý júrgizýdi tapsyrǵan.

Abaı Júnisovtyń sózinshe, ony shyndyq detektorymen tekserý úshin bir jerge jetkizgen.

«Olar meni bir kabınetke kirgizdi. Maǵan qurylǵylar bekitip, meniń shetelde, Qazaqstanda jasyryn shottarym nemese aktıvterim bar-joǵyn anyqtaý úshin synaq júrgizdi»,- dedi ol.

Sot barysynda Abaı Júnisov burynǵy áıeli sottalýshy Gúlmıra Satybaldynyń týǵan ápkesi ekenin rastady.

Buǵan deıin Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldyǵa qatysty sot otyrysy bastalǵanyn jazǵan edik.

Aıta keteıik, aldyn ala tyńdaý kezinde, aıyptalýshy G. Satybaldy alqabıler sotyna qatyspaıtynyn jetkizgen bolatyn.

Esterińizge sala keteıik, byltyr Gúlmıra Satybaldy bireýdiń múlkin ıemdený jáne jymqyrý qylmystyq isi boıynsha 7 jylǵa bas bostandyǵynan aıyryldy.

Sondaı-aq sot oǵan 10 jyl boıy kommertsııalyq uıymdarda basshylyq laýazymdardy atqarýǵa tyıym saldy.

Gúlmıra Satybaldy kásiporyndardyń qatysý úlesin zańsyz ıemdený, sonyń ishinde adam urlaýmen ushtasqan eki fakti boıynsha tergeýge alynǵan edi. Jábirlenýshige kelgen zalal somasy – 6,6 mlrd teńgeden asady.

Sondaı-aq, Gúlmıra Satybaldy sotqa deıingi tergeý kezinde shekara asyp ketpek bolǵan.

Gúlmıra Satybaldy aıyptaýlarmen kelispeıtinin aıtyp, ádil sheshim qabyldaýǵa ótinish jasaǵan bolatyn.