Gúlmıra Satybaldy isi boıynsha sot tergeýi aıaqtaldy

ALMATY. KAZINFORM – Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldy isi boıynsha sot tergeýi aıaqtaldy. Endi sot jaryssózderi ótedi.

Sýdıa Martpek Kákimjanov qylmystyq is boıynsha 17 sot otyrysy ótkenin jáne taraptar málimdegen barlyq kýágerden jaýap alynǵanyn, sondaı-aq is materıaldary jarııa etilgenin atap ótti.

Sot otyrysy barysynda qorǵaýshy tarap sot tergeýin jalǵastyrýdy surady. Alaıda sýdıa aıyptaýshy tarap pen qorǵaýshy taraptan is boıynsha sottalýshylardy aıyptaıtyn da, aqtaıtyn da dáleldemeler jıyntyǵy usynylǵanyn aıtty.

«Dáleldemelerdiń jıyntyǵy keńesý bólmesinde sottyń aıyptalýshyǵa taǵylyp otyrǵan aıyptyń dáleldengeni nemese dáleldenbegeni týraly qorytyndy jasaýy úshin jetkilikti. Joǵaryda aıtylǵandardy eskere otyryp, sot tergeýin aıaqtaý jáne sot jaryssózderin taǵaıyndaý múmkindigi týraly qorytyndyǵa keldi. QPK-niń 22 jáne 344-baptarynyń negizinde sot qaralyp otyrǵan is boıynsha sot tergeýin aıaqtaýǵa sheshim qabyldady», – dedi sýdıa.

Sýdıa Martpek Kákimjanov sot jaryssózi 22 tamyzda saǵat 10.00-de bastalatynyn atap ótti.

Eske salaıyq, buǵan deıin kásipker Abaı Júnisov Gúlmıra Satybaldy birlesken seriktestikte urlyq jasady degen kúdikpen kinásin moıyndaýdy talap etip, 2019 jyldyń aqpanynan beri úıinde zańsyz qamaýda ustaǵanyn aıtqan edi. 

Sot otyrysy kezinde Gúlmıra Satybaldy ózine taǵylǵan aıyppen kelispeıtinin málimdedi. 

Byltyr Gúlmıra Satybaldy bireýdiń múlkin ıemdený jáne jymqyrý qylmystyq isi boıynsha 7 jylǵa bas bostandyǵynan aıyryldy.