Gúlmıra Satybaldanyń isi: jábirlenýshi aıyptalýshymen birlesken jobalary týraly aıtty

ALMATY. KAZINFORM – Almatyda Gúlmıra Satybaldaǵa qatysty sot protsesi jalǵasyp jatyr. Jábirlenýshi Qasym Júnisov aıyptalýshynyń kórsetken kómegi týraly aıtty.

Aıtýynsha, Gúlmıra Satybaldy men aǵasynyń kompanııasy memlekettik nysandar salǵan. Qasym Júnisov 2011 jyly aǵasy Abaı Júnisovtiń shaqyrýymen Baur Kazakhstan kompanııasyna jumysqa ornalasqan.

«Abaı maǵan óz qarajatyna seriktestik qurǵanyn, onyń úleskeri úsh adam bolatynyn aıtty. Sondaı-aq ol maǵan Gúlmıra Satybaldynyń bizge ákimshilik resýrspen kómektesetinin jetkizdi. Biz oǵan sendik, sebebi ol Qaırat Satybaldymen jáne QR Tuńǵysh Prezıdentiniń otbasymen jaqsy qarym-qatynasta boldy. Birge jumys istegende bizge jaqsy kómektesti. Bizdiń birinshi jobamyz 1200 oryndyq mektep boldy. Biz jobany eki jylda sátti aıaqtadyq. Ekinshi jobamyz – eki NZM mektebi (Nazarbaev Zııatkerlik mektepteri). Onyń qarjysy birinshisinde – 4,5 mlrd teńge, ekinshi mektep boıynsha – 3,7 mlrd teńge. Sondaı-aq muz aıdyny – 24 mlrd teńge. Bul jobalarda qıyndyqtar bolǵan joq. Biz ony ýaqytynda aıaqtadyq. Muz aıdynyna qatysty Nazarbaevtyń ózi kelip, qabyldady. Sondaı-aq, 2015 jyly Qalqamandaǵy NZM-niń ashylýyna Baýyrjan Baıbek (Almaty qalasynyń eks-ákimi) kelgen. Ekeýmizdiń sýretterimiz bar», - dedi ol.

Jábirlenýshi Qasym Júnisovtiń advokaty Oljas Karbozın qylmystyq is materıaldaryna joǵaryda atalǵan nysandardy ashý kezinde túsirilgen fotolardy engizýdi surady.

Advokat Rashıd Teńizbaev Almatynyń burynǵy ákimi Baýyrjan Baıbek pen QR Tuńǵysh Prezıdent Nursultan Nazarbaevpen birge túsirilgen sýretterde aǵaıyndy Júnisovter Gúlmıra Satybaldy, Batyrbekov, Qabenovtar da bar ekenin túsindirdi. 

Onyń aıtýynsha, bul fotosýretter jobalar boıynsha zań buzýshylyqtar men quqyqtyq daýlardyń joqtyǵyn rastaıdy.

«Zań buzýshylyqtar, sot daýlary, qaryzdar, keleńsizdikter bolsa, Prezıdent kelip qabyldamas edi», - deıdi advokat. 

Jábirlenýshi bul fotosýrettermen jobalardyń ýaqytynda aıaqtalǵanyn dáleldegileri keletinin aıtty. Qorǵaýshy tarap ta ótinishti qanaǵattandyrýdy surady, sýdıa ony qanaǵattandyrdy. 

Buǵan deıin jábirlenýshi, olardy shyndyq detektorymen tergeý júrgizgenin jetkizgen edi.

Aldynǵy sot otyrysynda kásipker Abaı Júnisovtiń aǵasy Altaı Júnisovtyń sóılegen bolatyn. 

Eske salaıyq, Almatynyń qylmystyq ister jónindegi mamandandyrylǵan aýdanaralyq sotynda Gúlmıra Satybaldyǵa qatysty sot otyrysy ótip jatyr. Onymen birge onyń kómekshisi ári júrgizýshisi Mádı Batyrshaev ta otyr.