Gúlmıra Saǵıdýllına: 30 jylda medıtsına salasynda aýqymdy ózgerister boldy
Gúlmıra Saǵıdýllına «Táýelsiz Qazaqstan: Jasampazdyqqa toly jyldar. Shyǵys Qazaqstan oblysynyń basty jetistikteri» atty dóńgelek ústelde óńir medıtsınasynyń qalaı damyp kele jatqandyǵyn aıtyp berdi.
«1992 jyly men medıtsınalyq ınstıtýtty bitirgen jas maman retinde Óskemen qalasyna jumys isteýge keldim. Táýelsizdikti endi alyp, táı-táı basyp kele jatqan memleketimizdiń medıtsına salasy da ol kezde endi ǵana damı bastady. Shynyn aıtý kerek, bastapqy jyldary óte qıyn boldy. Maman jetispeýshiligi qatty sezildi, aýrýhanalar qajetti qurylǵylarmen jabdyqtalmaǵan edi. Sáıkesinshe, halyqqa kórsetilgen medıtsınalyq kómektiń sapasy da kóńil kónshitpedi. Tipti keıde 7-8 aı boıy jalaqymyzdy ala almaı júrdik. Jyldar óte kele jaǵdaı durystala bastady. Sóıtip, osyndaı aýyr kezder artta qaldy», - deıdi ol.
ShQO Onkologııa jáne hırýrgııa ortalyǵy dırektorynyń sózinshe, qazirgi ýaqytta óńirdiń medıtsına salasy aýqymdy jetistikterge jetken. 30 jyldyń ishinde Shyǵys Qazaqstanda 107 densaýlyq saqtaý nysany boı kóterdi.
«Aımaq basshysy Danıal Ahmetovtiń bastamasymen oblysta densaýlyq saqtaý salasyn damytýdyń arnaıy baǵdarlamasy jasaldy. Sonyń nátıjesinde, jyl saıyn aýrýhanalarǵa qomaqty qarajatqa zamanaýı jabdyqtar satyp alynyp, aq halattylar Eýropa elderine baryp biliktilikterin shyńdaýda. Osy eki jumystyń qatar atqarylǵany asa mańyzdy. Sebebi ozyq qurylǵylardy paıdalaný úshin medıtsına qyzmetkerleriniń tıisti bilimi bolýy kerek», - deıdi Gúlmıra Saǵıdýllına.
Óz sózinde ol koronavırýs pandemııasy medıtsına qyzmetkerleriniń qoǵamdaǵy rólin aıshyqtap bergendigin aıtty. Sondyqtan halyq densaýlyǵyn kúzetetin aq halattylarǵa memleket tarapynan qoldaý kórsetilgeni quba-qup.