Gúlmıra Mursalova: AES-ti damyǵan elder ǵana salady dep aıtý - qate pikir
ALMATY. KAZINFORM – Almatyda atom elektr stantsııasyn salý máselesi talqylandy. Qoǵamdyq talqylaýǵa jaýapty vedomstvo men ákimdik ókilderi, qoǵamdyq keńestiń músheleri, qala turǵyndary men sarapshylar qatysty.
Qoǵamdyq talqylaý kezinde QR EM Atom energetıkasy jáne ónerkásip departamenti dırektorynyń orynbasary Gúlmıra Mursalova elimizdegi elektr stantsııalarynyń jaǵdaıyna toqtaldy.
- Qazaqstanda elektr stantsııalarynyń 70%-y kómirmen jumys isteıdi. Olardyń tozý deńgeıi óte joǵary. Oǵan qosa, Qazaqstanda energııa tutyný kólemi de ósip jatyr. Sondyqtan úkimet kelesi 10 jyldyqta 26,5 GVt qýattylyǵy bar stantsııalardy iske qosýdy josparlap otyr. Sebebi bolashaqta tozǵan stantsııalardyń keıbiriniń jumysyn toqtatý kerek bolady. Osy 26,5 GVt ishinde jańartylǵan energııa kózderi bar, - dedi spıker.
Sondaı-aq ol kómirmen jumys isteıtin stantsııalarǵa qaraǵanda AES-tiń qandaı artyqshylyǵy bar ekenin atap ótti.
- Árıne, kómirmen jumys isteıtin qoldanystaǵy stantsııalarǵa da jóndeý jumystary júrgiziledi. Alaıda qazirgi ýaqytta álemdegi ekologııalyq jaǵdaıǵa baılanysty kómirmen jumys isteıtin stantsııalarǵa halyqaralyq uıymdarmen qarjy bólinbeıdi. Sebebi kómirmen jumys isteıtin stantsııalardan óte kóp kómirqyshqyl gaz bólinedi. Osy sebepten biz turaqty jumys isteıtin ári jasyl energetıkaǵa jatatyn atom elektr stantsııasyn qarastyryp jatyrmyz. AES referendým nátıjesi oń bolǵan kezde ǵana salynady, - dedi ol.
Gúlmıra Mursalovanyń aıtýynsha, AES-ti damyǵan elder ǵana salady dep aıtý - qate pikir.
- 2800 MGb qýattylyǵy bar atom elektr stantsııasymen birdeı energııa kózin alý úshin jelmen jumys isteıtin 8 stantsııany salý kerek. Sondyqtan qazir álem atom elektr energııasyna qarap otyr. Qazir álemde 415 reaktor jumys isteıdi. Onyń kóp bóligi AQSh pen Frantsııada. Biraq AES-ti damyǵan elder salady dep aıtý - qate pikir. Olar ózderin turaqty energııamen qamtamasyz ete alǵandyqtan, damyǵan memleketterge aınaldy. Byltyr qoldanylǵan 115 mlrd KVt saǵattyń 2 mlrd KVT saǵatyn biz Reseıden josparly túrde satyp aldyq. Bolashaqta kórshilerdiń elektr energııasyna táýeldi bolmas úshin biz ózimizdi qamtamasyz etýimiz kerek, - dedi Gúlmıra Mursalova.