Gúlmıra Isımbaeva: Kezekten tys saılaý ótkizý - ýaqytyly ári oryndy sheshim
«QR Prezıdentiniń kezekten tys saılaýy der kezinde ótkizilgeli tur dep oılaımyn. Biz álem elderimen qarym-qatynastamyz, onyń ishinde parlamentaralyq baılanystar ornatylǵan. Atap aıtqanda, el halqy da, shet memleketter de Qazaqstannyń aldaǵy damý jolyna qatysty tıisti bir belgini kútip tur. Búginde «Qazaqstanda ary qaraı ne bolady? Qandaı jaǵdaı qalyptasady? Qandaı saıasat júrgiziledi? Qazaqstanmen qarym-qatynasty jalǵastyrýdyń baǵyty qalaı bolady?» degen saýaldar bar ekeni belgili», - dep toqtaldy G. Isımbaeva.
Onyń sózine qaraǵanda, elimizge ınvestıtsııa salyp, bıznes jasap jatqandardy da osy suraqtar mazalaıtyny anyq.
«Biz naqty zańnama júzinde, ashyq túrde Prezıdent saılaýyn kútip otyrmyz. Osydan keıin barlyq saýaldarǵa jaýap beriledi. Sonda barlyǵy ornyna túsip, eshqandaı basqa suraqtar bolmaıdy», - dedi Májilis tóraǵasynyń orynbasary.
Aıta keteıik, keshe Memleket basshysy Qasym-Jomart Toqaev otandyq telearnalar arqyly Qazaqstan halqyna úndeý arnap, onda elimizdiń Konstıtýtsııasyna sáıkes Qazaqstan Respýblıkasy Prezıdentiniń kezekten tys saılaýyn 2019 jyldyń 9 maýsymynda ótkizý týraly sheshim qabyldaǵanyn jarııalaǵan bolatyn.
«Qazaqstan - demokratııalyq memleket. Prezıdent halyqtyń tańdaýymen saılanady. Men, Memleket basshysy retinde saılaýdyń taza, ashyq ári ádil ótýine kepildik beremin! Bul - meniń berik ustanymym! Aldymyzda zor mindetter tur. Men halqymyzǵa, ıaǵnı Sizderge senemin», - degen edi Q.Toqaev.
