Gúlmıra Isaeva QR Aýyl sharýashylyǵy vıtse-mınıstri qyzmetine taǵaıyndaldy

ASTANA. 11 qazan. QazAqparat - QR Aýyl sharýashylyǵy mınıstri Asyljan Mamytbekov mınıstrlik ujymyna jańa vıtse-mınıstr - Gúlmıra Isaevany tanystyrdy, dep habarlady vedomstvonyń baspasóz qyzmeti.

G. Isaeva buǵan deıin «QazAgroÓnim» AQ-nyń basqarýshy dırektory boldy.

Isaeva Gúlmıra Sultanbaıqyzy 1969 jyly 23 tamyzda Almaty oblysynda dúnıege kelgen. 

Ol 1991 jyly «Et jáne et ónimderiniń tehnologııasy» mamandyǵy boıynsha Semeı et jáne sút ónerkásibi tehnologııalyq ınstıtýtyn úzdik támamdaǵan, aýyl sharýashylyǵy ǵylymdarynyń kandıdaty (1996 j.), Fılosofııa doktory (PhD, 2010 j.).

Óziniń eńbek jolyn 1991 jyldyń tamyzynda Semeı et jáne sút ónerkásibi tehnologııalyq ınstıtýtynyń oqytýshysy qyzmetinen bastady.

1991-1994 jj. - Qazaq qoı sharýashylyǵy tehnologııalyq ǵylymı-zertteý ınstıtýtynyń aspırantýrasynda oqydy.

1994-1998 jj. - Qazaq qoı sharýashylyǵy tehnologııalyq ǵylymı-zertteý ınstıtýtynda ár túrli qyzmette boldy.

1998-2000 jj. - «Eńbek» aýyl sharýashylyǵy óndiristik kooperatıviniń et jáne et ónimderin qaıta óńdeý boıynsha bas tehnolog bolyp jumys jasady.

1996-2001 jj. - Myńbaev atyndaǵy tájirıbelik sharýashylyǵynyń mal sharýashylyǵy ónimderin óndirý jáne qaıta óńdeý jónindegi ǵylymı keńesshisi, zootehnık-selektsıoneri.

2001-2007 jj. - Qazaq Ulttyq agrarlyq ýnıversıtetiniń mal sharýashylyǵy tehnologııasy fakýlteti dekanynyń oqý isi boıynsha orynbasary, aǵa oqytýshysy.

2007-2011 jj. - «Srown Central Asia» jaýapkershiligi shekteýli seriktestiginiń Mal sharýashylyǵy jáne etti qaıta óńdeý departamentiniń dırektory, kommertsııalyq dırektory boldy.