Gúlqasıma Súıintaeva: Konstıtýtsııa májbúrli nekege qarsy quqyqtyq negiz qalyptastyrady
ASTANA. KAZINFORM — Jańa Konstıtýtsııa jobasynda nekeni er men áıeldiń erikti ári teń quqyqty odaǵy retinde bekitý usynylyp otyr. Bul májbúrli nekege qarsy qosymsha quqyqtyq negiz qalyptastyrady. Bul týraly Konstıtýtsııalyq reforma jónindegi komıssııanyń búgingi otyrysynda Aqtóbe oblystyq máslıhatynyń tóraǵasy Gúlqasıma Súıintaeva aıtty.
— Neke tek erikti bolýy tıis jáne memlekette resmı tirkelýi qajet. Bul áıelderdiń quqyqyǵyn qorǵaýdy kúsheıtedi jáne kez kelgen májbúrleý áreketiniń aldyn alýǵa quqyqtyq negiz beredi, — dedi ol.
Onyń aıtýynsha, jańa Konstıtýtsııa jobasy memlekettik organdardyń jaýapkershiligin arttyryp, qoǵam senimin kúsheıtetin normalardy da qarastyrady. Sonymen qatar qujat ekonomıkany damytýǵa, ınvestıtsııa tartýǵa, bilim men ınnovatsııany qoldaýǵa quqyqtyq negiz jasaıdy.
— Jańa Ata zań azamattardyń quqyqtaryn qorǵaýmen qatar bir palataly parlament pen Halyq keńesi ınstıtýty arqyly qoǵamdyq qatysýdy qamtamasyz etedi. Konstıtýtsııada halyq memlekettik bıliktiń birden-bir qaınar kózi bolyp, adam quqyqtary basty basymdyq retinde bekitilgen, — dedi Gúlqasıma Súıintaeva.
Sonymen qatar, Konstıtýtsııada jer men tabıǵatty qorǵaý, ulttyq qundylyqtardy saqtaý, egemendik pen táýelsizdikti nyǵaıtý prıntsıpteri bekitilgen. Bul eldiń turaqty damýyna jáne ádil qoǵam qalyptastyrýǵa berik quqyqtyq negiz bolady.
Aıta keteıik, Memlekettik keńesshi nelikten jańa Konstıtýtsııa qabyldaý qajet ekenin túsindirgen edi.
