Gúlishan Nahbaeva shahmattan Qazaqstannyń 7 dúrkin chempıony atandy
NUR-SULTAN. QazAqparat - Almatyda áıelder arasynda ótip jatqan Qazaqstan chempıonaty aıaqtaldy.
9 raýndtan keıin grossmeıster Gúlishan Nahbaeva jetinshi márte Qazaqstan chempıony atandy. Vıtse-chempıondyq ataqty Gúlmıra Dáýletova jeńip aldy. Respýblıkamyzdan jınalǵan 10 shahmatshy el chempıony atalymy men 2,5 mln teńge kólemindegi júlde qory úshin baq synasty.
«Komandalyq álem chempıonatynan keıin respýblıkalyq birinshilik aıtarlyqtaı qıyn týrnır emes bolyp kórinýi múmkin. Alaıda bul úlken qatelik, - deıdi Gúlishan.
«Meniń qarsylastarymnyń barlyǵy - myqty shahmatshylar. Degenmen, jeńiske jetý úshin men bar kúshimdi saldym».
Qazaqstan chempıony 600 000 tg aqshalaı syılyqtan ózge Azııa chempıonaty men zonalyq týrnırge qatysý quqyǵyna ıe bolady. Áıelder arasyndaǵy fınalǵa elimizden 10 shahmatshy qatysty. Týrnır qorytyndysy boıynsha 4-ten 10-ǵa deıingi oryndar Ásel Serikbaı, Zeınep Sultanbek, Alfııa Nasybýlına, Ámına Qaıyrbekova, Merýert Qamalıdenova, Elena Ankýdınova jáne Arýjan Shaýken arasynda bóliske tústi.
Áıelder fınaly FIDE reıtıngisimen eseptelgen 9 raýndta aınalmaly júıe boıynsha ótkizildi. Chempıonatqa ótken jylǵy fınaldyń jeńimpazdary, jartylaı fınaldyń jeńimpazdary, sondaı-aq Qazaqstan quramasynyń músheleri qatysty.
