«Gúlder» ansambli Túrkııadaǵy Naýryz festıvalinde óner kórsetti
ASTANA. KAZINFORM – Roza Baǵlanova atyndaǵy «Qazaqkontsert» memlekettik akademııalyq kontserttik uıymynyń «Gúlder» ansambli Túrkııanyń Amasııa qalasynda ótken Naýryz festıvalinde óner kórsetti. Bul týraly QR Mádenıet jáne aqparat mınıstrliginiń baspasóz qyzmeti málimdedi.
Festıval túrki elderiniń rýhanı murasyn nasıhattaýǵa baǵyttalǵan. Jyl saıyn ótetin festıval bıyl 4 kúnge sozyldy.
Qazaqstannan kelgen qatysýshylar «Naýryz» atty basty merekelik is-sharada óner kórsetti. «Gúlder» ansambliniń úsh solısi festıvaldyń kontserttik baǵdarlamasynda birneshe horeografııalyq kompozıtsııa usyndy. Olardyń arasynda Anvara Sadyqova men Almat Shámshıev kórermenniń kóńilinen shyqqan «Qara jorǵa», «Altynaı», «Kóńil tolqyny», «Men qazaqtyń qyzymyn», «Jetisýym», «Toqymqaǵar», «Ermek» bı kompozıtsııalaryn qoıdy.
Ujym músheleri atalǵan kompozıtsııalardy jeke, dýet jáne trıomen oryndady. Sondaı-aq festıval aıasynda «Gúlder» ansambliniń bas baletmeısteri Anvara Sadyqova festıval qatysýshylary men jergilikti ártister úshin qazaq bıi boıynsha sheberlik sabaǵyn ótkizdi.
