«GULDER» ansambli Malaızııadaǵy halyqaralyq festıvalde óner kórsetti

ASTANA. KAZINFORM — Roza Baǵlanova atyndaǵy «Qazaqkontsert» memlekettik akademııalyq kontserttik uıymynyń «GULDER» ansambli Malaızııada ótken «ASEAN 2025» halyqaralyq mýzykalyq-mádenı festıvalinde óner kórsetti. Bul týraly Mádenıet mınıstrliginiń baspasóz qyzmeti habarlady.

Ansambl dástúrli jáne zamanaýı horeografııalyq baǵyttardy úılestirgen mazmundy kontserttik baǵdarlamasyn usyndy. Ujym «Aqqý», «Asataıaq», «Qýanysh dýman», «Qarlyǵash», «Daırabaı», «Qaratorǵaı», «Toqymqaǵar», «Qorqyt» horeografııalyq qoıylymdaryn, sondaı-aq Malaızııa, Mońǵolııa jáne Qytaı halyqtarynyń bıin oryndady. Sahnada halyqaralyq baıqaýlardyń laýreattary men «GULDER» ansambliniń jetekshi ártisteri óner kórsetti.

Mádenı dıalog pen halyqaralyq yntymaqtastyqtyń jarqyn úlgisi bolǵan kontsertti álemniń ár túkpirinen kelgen 300-den astam kórermen tamashalady.

Keıingi úsh jylda ansambl Shvetsııa, Frantsııa, Germanııa, Latvııa, Qytaı jáne Túrkııa elderindegi bedeldi sahnalarda Qazaqstan atynan óner kórsetip júr.

Aıta keteıik, qazan aıynda Qyzylorda teatry halyqaralyq festıvalde top jardy.