«Gúlder» ansambli Dúnıejúzilik kóshpendiler oıyndarynyń «Etno-bı» baıqaýynda Gran-prı ıelendi
ASTANA. KAZINFORM — Roza Baǵlanova atyndaǵy «Qazaqkontsert» memlekettik akademııalyq kontserttik uıymynyń «Gúlder» memlekettik ansambli Qyrǵyzstanda ótken VI Dúnıejúzilik kóshpendiler oıyndarynyń Nomad Fest festıvali aıasyndaǵy halyqaralyq «Etno-bı» baıqaýynda Gran-prı ıelendi.
Óner dodasyna Mońǵolııa, Túrkııa, Bolgarııa, Tyva Respýblıkasy, Saha Respýblıkasy (ıAkýtııa), Úndistan, Pákistan, Qyrǵyzstan jáne basqa da elderden kelgen kásibı ujymdar qatysty.
«Gúlder» TURAN ansambliniń mýzykasyna qoıylǵan «Er Turan» jáne STEPPE SONSE tobynyń mýzykasyna jazylǵan «Qorqyt» atty eki horeografııalyq qoıylymdy kópshilikke usyndy. Qazylar alqasy ansambldiń oryndaý sheberligimen qatar, baletmeısterlerdiń kásibı daıyndyǵyn da baǵalady. Baıqaý qorytyndysynda shyǵarmashylyq eńbektiń nátıjesi retinde Anvara Sadyqova men «Gúlder» ansambli Gran-prı ıelendi.
Halyqaralyq baıqaý baǵdarlamasyna Anvara Sadyqova, Almat Shámshıev, Ernur Qaryqbol jáne Dana Musanyń horeografııalyq qoıylymdary endi. Sonymen qatar festıval barysynda ansambl keńeıtilgen horeografııalyq baǵdarlamamen óner kórsetip, gala-kontsertte Morıs Raveldiń mýzykasyna qoıylǵan «Zamana jańǵyryǵy» etno-baletin oryndady.
