«Gúldengen sotsıalızm» tusynda da mundaı qamqorlyq bolmaǵan – Prezıdent oqýshylardy ystyq tamaqpen qamtý týraly
ASTANA. KAZINFORM – Elimizde az qamtylǵan nemese aýqatty otbasydan shyqqanyna qaramastan, 1-4 synyp oqýshylarynyń barlyǵyna ystyq tamaq beriledi. Memleket basshysy Qasym-Jomart Toqaev mektep mázirinen fastfýd, gazdalǵan sýsyn jáne ózge de zııandy taǵamdardyń alynyp tastalǵanyn atap ótti.
– Ystyq tamaq talaptar men normaǵa saı, tańǵy jáne túski as bala kúni boıy alýǵa tıis qunardyń 40 paıyzyn óteýi kerek. Mundaıdy qaı elden kórdińizder? Sondaı-aq shujyq, fastfýd, gazdalǵan sýsyn sekildi zııandy taǵam túrlerin mázirden tolyǵymen alyp tastadyq, qant pen tuz mólsherin azaıttyq. «Gúldengen sotsıalızmniń» tusynda da mundaı qamqorlyq bolmaǵan, – dedi Qasym-Jomart Toqaev Prezıdent saıabaǵynda ótken «Taza Qazaqstan» ekologııalyq aktsııasynda.
Sonymen birge, Parlamenttiń burynǵy quramy zańnamaǵa estý qabileti buzylǵan balalarǵa arnaıy qurylǵyny aqysyz berý týraly ózgerister engizý qajet dep uıǵardy.
– Mundaı apparattar shetelde shyǵarylady. Sondyqtan Úkimet tez arada otandyq óndiristi jolǵa qoıýy kerek. Jalpy, Úkimet Quryltaımen jáne qoǵamnyń belsendi ókilderimen birlesip, áleýmettik kómekter men jeńildikterdiń maqsatqa saı berilýin qamtamasyz etýi qajet. Bir sózben aıtqanda, memleket shyn máninde muqtaj jandarǵa kómek qolyn sozýǵa mindetti. Sonda ǵana ádildik saltanat qurady. Bul jumystan osy attas partııa da tys qalmaıdy dep senemin, – dep tapsyrma berdi Memleket basshysy.
Buǵan deıin Q. Toqaev Qazaqstanda jas anaǵa kórsetiletin qoldaý álemniń damyǵan elderinde joq ekenin aıtqan edi.
Onyń aıtýynsha, Memleket óziniń áleýmettik mindettemelerinen eshqashan bas tartpaıdy. Óıtkeni bul mindet Konstıtýtsııamyzda anyq ári týra jazylǵan.
