Gúldara Nurymova elimizdegi shaǵyn dárihanalar ne sebepti jabylyp jatqanyn aıtty
«Halyqpen kezdesýler kezinde shaǵyn nemese aýyldarda ornalasqan dárihanalar ıeleri 2023 jyldan bastap GPP halyqaralyq standartyna sáıkes bolýdyń qıyndyqtaryna qatysty máseleni kóterdi. Elimizde 10,5 myń dárihana bolsa, olardyń tek 8 paıyzy ǵana GPP talaptaryna sáıkes keledi. Osy talaptyń kesirinen shaǵyn dárihanalar jabylýǵa májbúr, al olardyń qyzmetkerleri jumyssyzdar qataryn tolyqtyrmaq. Búgingi tańda 150 dárihana jabyldy jáne 300-ge jýyq dárihana jumysyn toqtatýy múmkin. Atap aıtqanda, bul kórsetkish tek óse bermek», - dedi G. Nurymova Úkimet basshysynyń orynbasary Altaı Kólginovtyń atyna joldaǵan saýalynda.
Onyń paıymynsha, eldegi dárihanalar úshin qoldanystaǵy erejeler men normalar jetkilikti. Taǵy da basqa talaptar men erejelerdi engizýdiń qajeti joq.
«Barlyq qoldanystaǵy dárihanalarda lıtsenzııa bar jáne sanıtarlyq erejeler men normalardyń talaptaryna saı dáriniń durys saqtalýy úshin qajet jaǵdaılardyń barlyǵy saqtalǵan. Biraq osyǵan qosa, taǵy qosymsha talaptar engizilmek. Bir dárihanaǵa GPP standarttaryn engizý shamamen 5 mıllıon teńgeni quraıdy. Standart qymbat jabdyqty qosymsha satyp alýdy, jıhazdy jańartýdy talap etedi. Atalǵan standartty engizý dári-dármektiń qunyna qatty áser etedi - baǵa kem degende 27-30% kóteriledi. Keıbir dári-dármekter satylymnan joǵalady jáne bul adamdardyń densaýlyǵyna keri áser etetini sózsiz», - dedi depýtat.
Onyń sózine qaraǵanda, bul talaptar naryqtyń monopolııalanýyna, dárilerdiń kóleńkeli naryǵynyń ulǵaıýyna, jumyssyzdyqtyń artýyna, salyq túsimderiniń azaıýyna alyp keledi.
«GPP standartyn engizýdi talap etetin qosymsha bıýrokratııa ne úshin qajet? Joǵaryda aıtylǵandar negizinde, GPP standartyn engizýdi erikti túrde júrgizý múmkindigin usynamyz», - dedi Gúldara Nurymova.
