Gúldala aýylyndaǵy gaz jarylysy: zardap shekkenderdiń jaǵdaıy belgili boldy

Almaty oblysy Gúldala aýylynda jeke úılerde gaz jarylyp, tórt adam zardap shekken edi. Olardyń biri búgin aýrýhanada qaıtys boldy, dep habarlaıdy Kazinform.

17 jeltoqsan kúni saǵat 06:15–te Gúldala aýyly Baıtursynov kóshesi, 67 jáne saǵat 08:20–da Súıinbaı kóshesi, 34 mekenjaıyndaǵy jeke turǵyn úılerde gaz-aýa qospasynyń órshýinen gaz jarylǵan edi. Jarylys saldarynan 4 adam zardap shegip, aýrýhanaǵa jatqyzyldy. Bul týraly Almaty oblysy Talǵar aýdanynyń ákimdigi habarlaǵan edi. 

Zardap shekken eki adam Almaty kópsalaly klınıkalyq aýrýhanasyna óte aýyr jaǵdaıda jetkizildi. Olardyń biri búgin tańerteń qaıtys boldy.

«Aýyr jaraqattarǵa baılanysty 1991 jyly týǵan naýqas esin jımastan, qaıtys boldy. Onyń 3-4 dárejeli kúıigi boldy. Zardap shekken áıel áli reanımatsııada», — dep habarlady aýrýhananyń baspasóz qyzmeti.

Jarylystyń aldyn ala sebebi — tabıǵı gaz qubyryndaǵy qysymnyń joǵarylaýynan degen boljam bar. Oryn alǵan jaǵdaıǵa baılanysty aýdan ákimi Tanat Aıdarbekov oqıǵa ornyna baryp, zardap shekken otbasylardyń jaǵdaıymen tanysty. Sondaı-aq Gúldala aýyldyq okrýgi ákiminiń apparaty men aýdandyq tótenshe jaǵdaılar bóliminen aldyn alý sharalaryn uıymdastyryp, turǵyn úılerdi aralap, tekserý jumystaryn júrgizý tapsyryldy.