Gúlbaný Ázimhanova «Álem arýy» baıqaýyna qatysý úshin Qytaıǵa keldi
ASTANA. QazAqparat - «Qazaqstan arýy - 2016» Gúlbaný Ázimhanova «Álem arýy» baıqaýyna qatysý úshin Qytaıǵa keldi. Qazaqstan arýy tirkeýden ótip, basqa qatysýshylarmen birge 18 qarasha kúni Sanıa qalasynda ótetin halyqaralyq dodoǵa daıyndyqqa bilek sybana kirisip ketti, dep habarlaıdy QazAqparat «Qazaqstan arýy» baıqaýynyń dırektsııasyna silteme jasap.
19 jastaǵy Gúlbaný álemniń kóptegen eliniń qatysýshylarymen tanysyp, olarǵa Qazaqstan týraly aıtyp berdi. Jýyrda «Álem arýy - 2016» tıtýlynyń ıegeri pýerto-rıkolyq Stefanı Del Vallemen kezdesý ótti.
"Baıqaýǵa kelgenime kóp bolmady, dese de mundaǵy atmosferadan qaıran qalyp turmyn. Ár qatysýshy ózinshe sulý. Biz dostasyp ta úlgerdik, bir-birimizge qoldaý kórsetemiz. Birinshi kúni-aq óz elimizden ákelgen syılyqtarymyzdy tarattyq. Qazir salt-dástúrlerimiz, ulttyq taǵamdarymyz ben mádenıetimiz jaıly oı bólisýdemiz. Maǵan belsendi qoldaý kórsetip otyrǵan otandastaryma alǵys aıtqym keledi. Bul maǵan kúsh-qýat jáne ózime degen senim beredi", - dedi Gúlbaný Ázimhanova.
Qazir baıqaýǵa qatysýshylar daıyndyq júrgizýde, biraq jaqyn arada ártúrli kezeńder bastalady. Onyń ishinde sporttyq, áleýmettik jáne mádenı is-sharalar bar. Kezeńderdiń birinde "Qazaqstan arýy" Aral teńiziniń máseleleri men ony sheshý joldary týraly ekologııalyq jobany tanystyrady.
Bıyl "Álem arýynyń" uıymdastyrýshylary formatty azdap ózgertýdi uıǵarǵan. Baıqaý Head-to-Head Challenge formatynda ótkiziledi. Uıymdastyrýshylardyń pikirinshe, áleýmettik jeliler men ınterbelsendilikke basa nazar aýdarylady. Fınalǵa tek 40 qatysýshy ǵana ótedi, olar ártúrli is-sharalar men daýys berý nátıjeleri boıynsha anyqtalady.
"Álem arýy" baıqaýynyń eń basty mindeti Beauty with a Purpose ("Maqsatqa aparatyn sulýlyq") atty qaıyrymdylyq jobasy ǵana ózgerissiz qalady. Árbir jeńimpaz bir jyl boıy erikti elshi bolyp, ártúrli elderge saparlaıdy. «Variety International» halyqaralyq qaıyrymdylyq qoryna qarajat jınaý maqsatynda búkil álem boıynsha qaıyrymdylyq is-sharalaryna qatysady. «Variety International» 1928 jyldan beri múgedekter men baqytsyzdyqqa ushyraǵan jandarǵa kómek kórsetip keledi.
