Gúl dúkenindegi jaǵdaı: Shymkent memkirister mekemesiniń sheneýnigi qyzmetinen ketti

ShYMKENT. QazAqparat - Shymkent qalasy Eńbekshi aýdandyq memlekettik kirister basqarmasy basshysynyń orynbasary óz ótinishimen qyzmetinen bosatyldy, dep habarlaıdy QazAqparat tilshisi.

Shymkentte gúl satýshyny urǵan buzaqynyń is áreketi qoǵamda úlken rezonans týdyrǵan bolatyn. Áleýmetik jelide jarııalanǵan vıdeodan onyń qasynda Eńbekshi aýdany boıynsha memlekettik kirister basqarmasy basshysynyń orynbasary Danııar Elqondy bolǵany anyqtaldy.

Osy jaǵdaıǵa qatysty Shymkent qalasy boıynsha Memlekettik kirister departamenti basshysynyń buıryǵymen D.Elqondy «qatań sógis» túrinde tártiptik jazaǵa tartylǵan edi.

Búgin belgili bolǵandaı, Danııar Elqondy ózi bergen ótinish negizinde atqaratyn qyzmetinen bosatyldy.

«Qazaqstan Respýblıkasy Memlekettik qyzmet isteri agenttiginiń basshylyǵy tarapynan, qajet bolǵan jaǵdaıda qyzmettik tergep-tekserý júrgizý arqyly qoldanylǵan tártiptik jazanyń jasalǵan teris qylyqtyń aýyrlyǵyna sáıkestigi turǵysynan zerdeleý qajettigi týraly tapsyrma berildi. Alaıda, qazirgi ýaqytta D.Elqondy óziniń ótinishi negizinde atqaratyn laýazymynan bosatyldy. Qoldanystaǵy zańnama talaptaryna sáıkes, oǵan memlekettik qyzmetti óz erkimen toqtatýǵa kedergiler bolmady», - dedi QR Memlekettik qyzmet isteri agenttigi Shymkent qalasy boıynsha departamentiniń basshysy Shákir Sultanhan.

Eske salaıyq, Shymkenttegi gúl dúkeniniń jumysshylaryna qoqan-loqy kórsetken er adamdar týraly vıdeo taraǵan bolatyn.

Olardyń biri prokýratýra qyzmetkeriniń uly ekeni týraly aqparatty Shymkent qalasynyń prokýratýrasy joqqa shyǵardy.

Gúl satýshyny urǵan buzaqynyń qasyndaǵy ekinshi adam Eńbekshi aýdany boıynsha memlekettik kirister basqarmasy basshysynyń orynbasary ekeni anyqtaldy. Ol qyzmet ornynda qatań sógis aldy.