Guinness tóreshisi: Astana AI salasynyń mańyzdy ortalyqtarynyń birine aınalyp keledi
ASTANA. KAZINFORM — Búgin elordada HackAlem AI halyqaralyq hakatony ótip jatyr. Іs-sharaǵa Guinness World Records resmı tóreshisi Glenn Pollard qatysyp, Qazaqstan men Astananyń jasandy ıntellekt salasyndaǵy damýyna toqtaldy.
Onyń aıtýynsha, álemde jasandy ıntellekt týraly sóz bolǵanda kóbine AQSh, Qytaı men Japonııa atalady. Alaıda Qazaqstan da bul baǵytta belsendi damyp keledi.
— Qazaqstannyń, ásirese Astananyń jasandy ıntellektini damytýda mańyzdy ról atqaryp kele jatqanyn naqty aıta alamyn. Jańalyqtardan AQSh, Qytaı, Japonııa jáne basqa elder týraly jıi estımiz. Biraq Qazaqstan, ásirese Astana qazir AI salasynda belsendi damý kezeńinde, — dedi Glenn Pollard.
HackAlem AI aıasynda álemdik rekordty jańartý kózdelip otyr. Qazirgi Guinness World Records kórsetkishi Úndistanǵa tıesili. Ol byltyr jeltoqsanda ornatylǵan, sol kezde hakatonǵa 2 089 adam qatysqan.
Astanada ótip jatqan hakatonǵa 2 500 qatysýshy qatysyp jatyr. Degenmen qatysýshylar sanynyń rekordtan asýy jańa nátıjeni tirkeýge jetkiliksiz. Guinness World Records talaptaryna sáıkes ár qatysýshy belgilengen erejelerdi tolyq oryndaýy kerek.
— Bir qaraǵanda, rekordty jańartý ońaı sııaqty kórinedi. Alaıda belgili bir talaptar bar. Qatysýshylar hakaton barysynda tórt-bes saǵat jumys istep, jumys ornyn bir saǵattan artyq ýaqytqa tastap ketpeýi qajet. Tastap ketken jaǵdaıda ol jarystan shyǵarylady. Budan bólek, is-sharanyń sońǵy bir saǵatynda barlyǵy óz ornynda bolýy tıis, — dedi resmı tóreshi.
Glenn Pollardtyń pikirinshe, Guinness World Records ataǵyn ıelený hakatonnyń nátıjesimen ǵana shektelmeı, Qazaqstandaǵy AI salasynyń damýyna halyqaralyq nazar aýdarýǵa múmkindik beredi.
— Bul Qazaqstannyń álemde jasandy ıntellektini damytýda mańyzdy ról atqaryp otyrǵany týraly aqparatty keńirek taratýǵa jáne oǵan qosymsha qyzyǵýshylyq týdyrýǵa kómektesedi dep oılaımyn, — dedi ol.
Aıta keteıik, buǵan deıin atalmysh is-shara aıasynda Arizona State University-diń jahandyq seriktestikterdi damytý jáne halyqaralyq akademııalyq bastamalar baǵytynyń aǵa dırektory Krıs Djonson Qazaqstandaǵy bilim berý múmkindikteri týraly aıtyp bergen edi.
