Gucci «Formýla-1»-degi Alpine komandasynyń tıtýldyq seriktesi atandy
ASTANA. KAZINFORM – Gucci sán úıi «Formýla-1» chempıonatyndaǵy Alpine komandasynyń jańa tıtýldyq seriktesi bolady. Uzaq merzimdi yntymaqtastyqtyń bastalǵanyn frantsýz komandasy resmı túrde jarııalady, dep habarlaıdy RacingNews365 basylymy.
Basylymynyń málimetine súıensek, seriktestik 2027 jylǵy maýsymnan bastap kúshine enedi. Osydan keıin komanda «Gucci Racing Alpine Formula One Team» degen jańa ataýmen jarysqa qatysady.
Osylaısha Alpine komandasynyń BWT kompanııasymen bes jylǵa sozylǵan seriktestigi aıaqtalady. Buǵan deıin BWT komandanyń tıtýldyq seriktesi bolǵan.
Alpine ókilderiniń aıtýynsha, «Gucci Racing» jobasy tek sporttyq seriktestik qana emes, sonymen qatar avtosportty, sán ındýstrııasyn jáne oıyn-saýyq salasyn biriktiretin jańa jahandyq platformaǵa aınalady.
Gucci kompanııasynyń kelýimen Alpine komandasynyń fırmalyq stıli men bolıdter dızaıny aıtarlyqtaı ózgerýi múmkin. Sońǵy jyldary komanda BWT brendimen baılanysty qyzǵylt tústi keńinen qoldanǵan bolsa, 2027 jyldan bastap bezendirý tujyrymdamasy qaıta qaralady.
Alpine komandasynyń atqarýshy keńesshisi Flavıo Brıatore Gucci kompanııasymen aradaǵy bul yntymaqtastyqty komanda úshin mańyzdy kezeń dep atady.
– Alpine komandasy árdaıym «Formýla-1»-de ózgelerden erekshelenýge jáne bárinen bólek jol tańdaýǵa umtylyp keledi. Gucci kompanııasymen seriktestik bizdiń komandaǵa degen qyzyǵýshylyqtyń artyp kele jatqanyn jáne trassadaǵy jetistikterimizdi kórsetedi, – dedi Flavıo Brıatore.
Sondaı-aq Alpine bıylǵy «Formýla-1» maýsymyn sátti bastaǵanyn málimdedi. Chempıonattyń alǵashqy kezeńderinde komanda ótken jyldyń osy kezeńimen salystyrǵanda kóbirek upaı jınaǵan.
Gucci men Alpine arasyndaǵy kelisim sońǵy jyldardaǵy «Formýla-1»-degi eń aýqymdy marketıngtik jobalardyń biri sanalady. Sarapshylardyń pikirinshe, chempıonattyń jahandyq tanymaldyǵynyń artýyna baılanysty álemdik lıýks brendterdiń avtosportqa qyzyǵýshylyǵy da kúsheıip keledi.
Buǵan deıin Ferrari kompanııasynyń jańa elektr kóliginiń tusaýkeseri ınvestorlar men avtokólik áýesqoılary arasynda túrli pikir týǵyzǵan edi. Tanystyrylymnan keıin Ferrari aktsııalarynyń Mılan men Nıý-Iork qor bırjalarynda kúrt tómendep ketti.
