Gýandýn provıntsııasynda taıfýnǵa baılanysty 150 myńnan astam adam evakýatsııalandy
ASTANA. KAZINFORM — Qytaıdyń ońtústigindegi Gýandýn provıntsııasynda «Matmo» taıfýnynyń jaqyndaýyna baılanysty 150 myńnan astam turǵyn qaýipsiz aımaqtarǵa kóshirildi, dep habarlaıdy Sınhýa.
Jeksenbi kúni tańerteń Gýandýn provıntsııasynyń sý tasqynyna qarsy kúres jónindegi shtaby tabıǵı apatqa den qoıý deńgeıin ekinshi satydan eń joǵary birinshi deńgeıge kóterdi. Senbi keshke deıin barlyǵy 151 352 adam, sonyń ishinde 9 916 teńiz aımaqtarynan evakýatsııalanǵan.
Maýsymdaǵy Tynyq muhıty taıfýndarynyń ishinde 21-shi bolyp tirkelgen «Matmo» soltústik-batysqa qaraı saǵatyna shamamen 25 shaqyrym jyldamdyqpen qozǵalyp keledi. Mamandardyń boljamynsha, jeksenbi kúni túski shamasynda qurlyqqa shyǵyp, sekýndyna 45 metrge deıin jetetin ekpindi jelmen soǵatyn qýatty daýylǵa aınalmaq. Taıfýn soqqan aımaqtarda qatty jańbyr men jel kútiledi.
Taıfýnǵa daıyndyq aıasynda senbi keshinen bastap Chjantszıan qalasynda barlyq oqý oryndarynyń jumysy ýaqytsha toqtatylyp, óndiristik kásiporyndar men kólik qozǵalysy da shekteldi. Jeksenbi tańynan bastap barlyq avtomagıstralder jabyldy.
Gýandýn provıntsııasynyń teńiz isteri basqarmasy teńizdegi qatynasty ýaqytsha toqtatty, al qutqarý qyzmetteri joǵary daıyndyq rejımine kóshirildi.