Gýanchjoýde JKO zardap shekken stýdent Astana qalasynyń týmasy bolyp shyqty
BEIJІŃ - GÝANChJOÝ. QazAqparat - QHR Gýandýn provıntsııasy Gýanchjoý qalasynda jol-kólik oqıǵasynan zardap shekken jıyrma jastaǵy Erlan Amangeldi Ońtústik-Qytaı tehnologııalyq ýnıversıtetiniń «iskerlik qytaı tili» mamandyǵy boıynsha 4-kýrs (túlek) stýdenti.
«Ol sabaqty jaqsy oqıdy. Dıplom jumysyn jazǵanbyz. Aldyn ala qorǵaý ótýi tıis bolatyn. Oqıǵa 22 qarashada saǵat 19.30-da keshki ýaqytta oryn aldy. Qazir saqtandyrý máselesin sheship jatyrmyz, bizge ótemaqy tólenbeıtinin, Erlannyń ózi kináli ekenin aıtýda. Medıtsınalyq shyǵystardyń tym bolmasa jartysyn tólese dep kelissóz júrgizip jatyrmyz. Bizge muny sheshýge QHR-daǵy QR Elshiliginiń qyzmetkerleri kómektesýde», - dedi QazAqparat tilshisine, zardap shekken jigittiń dosy A. Rahadılov.
Onyń aıtýynsha, Erlan dýlyǵasyz bolǵan, burylysta tepe-teńdikti ustaı almaı, jol boıyndaǵy qalqan men erneý arasyndaǵy keńistikke ushyp ketken. Onymen birge kele jatqan Nargız Shandozovanyń denesinde birqatar jaraqattar, isikter men syrylǵan jerleri bar.
Zardap shekken boıjetkenniń qurbysy Álııa Aıtqulova oqıǵa oryn alǵan kúni Erlan men Nargızdiń izimen kele jatqan eken, ol qazir Erlan es-tússiz jatqanyn, bas jaraqatyn alǵanyn málimdedi.
«Dárigerler onyń esin jıǵanyn kútip otyr. Ony jaqsy aýrýhanaǵa jetkizý oılastyrylýda», - dedi ol.
Aıtqulovanyń aıtýynsha, Erlan mototsıkldi dosynan alǵan. Bir-eki kúnde qalaǵa stýdenttiń ákesi kelmekshi eken.
Eske salsaq, apattan keıin stýdentter Mandarin saıtyna JKO týraly aqparat ornalastyrdy, onda Qazaqstan týmasynyń qatty zardap shekkeni aıtylǵan.
