Gýanchjoýda ótetin jazǵy Azııa oıyndarynda qazaq boksshylary eki altyn alýdy kózdep otyr
ALMATY. 9 Qarasha. QazAqparat /Erbol Azanbek/ -Gýanchjoýda ótetin XVI jazǵy Azııa oıyndaryna qatysatyn Bokstan Qazaqstan quramasy kem degende 2 altyn medal alýdy kózdeıdi. Bul týraly búgin Almatyda ótken baspasóz máslıhatynda bokstan Qazaqtan quramasynyń bas jattyqtyrýshysy Myrzaǵalı Aıtjanov aıtty.
«Qazaqstan namysyn erler quramasynan 10, qyzdar quramasynan 3 boksshy qorǵaıdy. Bul joly komandaǵa negizinen jastar jınaqtaldy. Bulardyń altaýy bıyl Qazaqstan chempıony atanǵandar. Tájirıbeli boksshylardan Beıjiń olımpıadasyna qatysqan Birjan Jaqypov pen Serik Sápıev bar. Jalpy bizdiń aldymyzǵa 5-6 medal, onyń ishinde 2 altyn júlde alý maqsaty tur. Boksshylardyń barlyǵy 4-5 halyqaralyq jarystarǵa qatysyp, 14-15-ten kezdesýler ótkizdi. Jalpy boksshylarymyzdyń daıyndyǵy jaqsy deńgeıde, barlyǵy medal úshin judyryqtasýǵa daıyn. Aldaǵy dodada 64, 69, 91 keli salmaqtardan altyn kútemiz»,- dedi M.Aıtjanov.
Esterińizge sala keteıik XVI jazǵy Azııa oıyndary Qytaıdyń Gýańjoý qalasynda 12-27 qarasha aralyǵynda ótedi. Óz tarıhynda rekordtyq kórsetkish kórsetip, 10 myń sportshy qatysady dep boljanǵan oıyndar barysynda sporttyń 42 túri boıynsha 473 medal jıyntyǵy sarapqa salynady.
Oıyndarda Qazaqstan namysyn 363 sportshy qorǵaıdy. Onyń 13-i boksshylar. Bulardyń qatarynda 49 kelide Birjan Jaqypov, 52 kelide Mıras Jaqypov, 56 kelide Danııar Tólegenov, 60 kelide Samat Bashenov, 64 kelide Danııar Eleýsinov, 69 kelide Serik Sápıev, 75 kelide Danabek Sýjanov, 81 kelide Almat Serimov, 91 kelide Vasılıı Levıt, 91 keliden joǵary salmaqta Ivan Dychko, qyzdar quramasynan 51 kelide Jaına Shekerbekova, 60 kelide Saıda Hasenova, 75 kelide Marına Volnova bar.
